De Claude Turmes huet en Appel d'offres fir d'Realiséieren/Exploitéiere vun neien, méi groussen Zentrale fir d'Produktioun vu Solarenergie presentéiert.

Obwuel d'Energie aus Wandrieder a Sonneluucht, den Zuele vum Energieministère no, tëscht 2008 an 2018 en Zouwuess vun iwwer 530% kannt hätt, wëll den zoustännege Minister Claude Turmes de Photovoltaik-Beräich weider ausbauen. Bei der Photovoltaik léich Lëtzebuerg pro Kapp op der 6. Plaz an der EU, wat een nach verbessere wéilt.

Aus deem Grond goufen den Dënschdeg de Moien en Appel d'offres virgestallt, duerch deen Energie fir 27.000 Residente soll produzéiert ginn. D'Soumissioun dofir leeft bis Mäerz, an nodeems e virgeschloene Projet den Zouschlag krut, soll bannent 18 Méint Stroum an de Reseau agespeist ginn.

AUDIO: Photovoltaik / Rep. Eric Ewald

Iwwert dee Wee soll d'Zil vun 11% erneierbaren Energië bis 2020 erreecht ginn, och wann an den Ae vum Minister eréischt Mëtt dat anert Joer méi Prezises dozou ze soe wär.

Wann ee bei der Wandkraaft an de leschte Jore gutt virukomm wär, hätt et bei der Solarenergie ee Moment eng Stagnatioun ginn, sou den Energieminister. An deem Kontext koum a kënnt et am Ganzen zu 3 Aktiounen: E Règlement grand-ducal fir déi kleng Anlagen an d'Kooperativ-Anlagen, en Appel d'offres fir grouss Anlagen am 200 a 500 Kilowatt-Beräich an och am Megawatt-Beräich an e Gesetz, bei deem et ëm d'Eege-Consommatioun vum Solar-Stroum doheem geet.

Claude Turmes iwwer Photovoltaik - Deel 1/ Rep. Eric Ewald

Et hätt een e koherente Plang, mat dem Lancement vun deem Appel d'offres fir grouss Anlagen, sot de Claude Turmes.

Et géif vill Intressi vu Säite vu Privatleit ginn, huet de Claude Turmes erkläert, wat de Gilbert Théato, Direkter vu myenergy confirméiert. Op hirer Hotline wier elo an an de leschte Méint vill lass gewiescht, sou de Gilbert Théato. Net nëmme Privatleit, mä och Betriber wären u Photovoltaik interesséiert, wisou e Mëttwoch an an zwou Wochen an der Chambre des Métiers eng Informatiounsversammlung ass.

Déi éischt Etapp vun der Strategie hätt ee gutt hannert sech bruecht, huet den Energieminister gemengt. Elo hofft hien op kleng a grouss Betriber, fir "dass mer an engem Moment, wou, mengen ech, jiddereen awer versteet, dass Klimaschutz eng Urgence ass, dass mer all eng reell Aktioun kënne maachen, fir Stroum, Kuel an och Atomstroum z'ersetzen", fënnt de Claude Turmes. De Georges Reding, Chargé de direction fir erneierbar Energien am Ministère, huet nach ervirgehuewen, dass et an Zukunft méi Kategorië wäert ginn, ënnert anerem op Industrieterrainen an op Gebaier, a gestaffelt Präisser. Woubäi Industrie-Flächen déi einfachst Maximalpräisser hunn, well déi am Prinzip am einfachsten ze realiséiere wieren, seet de George Reding.

De Claude Turmes ass donieft op déi rezent Departen an der Direction de l'énergie ugeschwat ginn. De grénge Politiker huet gemengt, dowéinst sollt keng gréisser Opreegung entstoen an ee sech net ze vill Suerge maachen: Si hätten eng Erneierbar-Unitéit, déi d'Appelle virbereet huet, eng Unitéit vum Gas- an Elektresch-Marché a si hätte 4 nei Leit agestallt an Enn des Joers géingen nach 3 weider Persounen an d'Ekipp dobäi kommen, sou den Energieminister.

Claude Turmes iwwer Photovoltaik - Deel 2/ Rep. Eric Ewald

De Claude Turmes huet och betount, vum Rescht vun der Regierung ënnerstëtzt ze ginn.

Den entspriechenden Appel d'offres gëtt de Mëttwoch an der Press publizéiert.