Dat huet de Premier Xavier Bettel en Donneschdeg de Mëtteg nom Regierungsrot. Ausserdeem huet hien sech iwwert de Brexit geäussert.

„Den Här Braz ass an enger Situatioun, wou mer op definitiv Diagnostike waarde vun den Dokteren!“: Dat sot de Xavier Bettel an der Mëttesstonn, nom Regierungsrot, zum Zoustand vum grénge Politiker.

AUDIO: Sam Tanson / Felix Braz - Reportage Eric Ewald

Dem Premier no kritt de Felix Braz nach weider Exame gemaach, zum Beispill e Donneschdeg. Wann et nei Informatiounen zum Zoustand vum grénge Politiker gëtt, da géif d'Regierung déi matdeelen.

„Fir de Moment ass et okay! Ech maache mäi Bescht, fir déi 3 Saachen ënner en Hutt ze kréien. Ech sinn am Modus, fir ze schaffen an net fir z'iwwerleeën, wat fir Contrainten dat sinn: Ech maachen dat elo!“ Dat sot d'Logements-, Kultur- an neierdéngs temporär Justizministesch Sam Tanson en Donneschdeg nom Ministerrot. Haut virun enger Woch hat si de leschtgenannte Ressort vum Felix Braz iwwerholl, Eric Ewald:

Et wär net evident, fir fir 3 Ressorte responsabel ze sinn, mä et wär een an enger aussergewéinlecher Situatioun, sou d'gréng Politikerin. Da misst een alt emol Aussergewéinleches maachen: "Dat ass keng ideal Situatioun, dat ass richteg! Ech probéieren, mer elo am Moment en Iwwerbléck ze schafen an der Justiz. Do sinn eng ganz Rëtsch wichteg a grouss Dossieren, wou ech mech wierklech muss an den Detail eraschaffen. An niewelaanscht hunn ech mam Wunnengsbau mat déi gréissten Erausfuerderung, déi mer an dëse Joren ze meeschteren hunn, wou mer och e ganz grousse Pensum hunn a wou mer eis wierklech vill virgeholl hunn, elo fir d'Rentrée, wou also och vill verlaangt ass, an dann an der Kultur, wou mer an der voller Ëmsetzung si vum Kulturentwécklungsplang.“

Virun deem Hannergrond hätt si hir Engagementer op dat Wesentlecht reduzéiert a géif de Moment sou gutt wéi net ëffentlech optrieden. Si hätt 3 ganz gutt opgestallte Ministèren hannert sech, misst sech awer am Justizministère eraschaffen. De Felix Braz wär och net nëmme fir ee Ministère verantwortlech gewiescht, mä hätt och d'Tâche vum Vize-Premier gehat: „Et ass och d'Koordinatioun, an der Regierung, fir eis Partei, an och d'Koordinatioun, natierlech, mat der Partei, déi elo de François Bausch iwwerholl huet. Dat gesäit een elo manner no baussen, mä dat sinn awer Saachen - elo net de Vize-Premier, mä eben déi ganz Koordinatiounsaarbecht, déi hien elo mécht -: Och vill, och eng grouss Belaaschtung!“

Nom Doud vum Camille Gira an nom Häerzinfarkt vum Felix Braz géif een, sot d'Sam Tanson, als Gring zwar net denken, dass ee vum Schicksal verfollegt wär: „...mä ech verheemlechen Iech net, dass et schwéier ass, jo!“.

Brexit

A Saache Brexit da wëll de Xavier Bettel, Zitat, „keng Verlängerung, wa kee Grond dofir do ass“; de Boris Johnson wéilt de Staatsminister iwwerdeems vun engem neien Deal iwwerzeegen, woufir de britesche Premier,wéi et ausgesäit, Kontakt wéilt mat him ophuelen.

D'nächst Woch wëll de britesche Premier Boris Johnson dann och eng Entrevue mam Lëtzebuerger Premier.

Nicolas Schmit an der EU-Kommissioun

Mat de Wierder „Den Nicolas Schmit krut dat, wat e wollt, an der Kommissioun: Dat ass eng gutt Noriicht fir hien, fir Lëtzebuerg a fir Europa!“ huet den Aarbechtsminister Dan Kersch en Donneschdeg nom Regierungsrot op d'Nominatioun vu sengem Virgänger zum EU-Kommissär reagéiert: „Ech mengen, d'Ziler si relativ kloer ofgestach. Mir Sozialiste sinn der Meenung, dass, wann Europa nach weider soll fonctionnéieren - an et gëtt keng aner Léisung, wéi dass et fonctionnéiert -, da muss Europa méi sozial ginn. An dofir ass et eng gutt Noriicht, dass e Lëtzebuerger Sozialist wierklech och deen Dossier kritt huet, Aarbecht a Soziales. A wa mer et fäerdegbréngen, an Europa déi nämmlecht Standarden ëmzesetzen, déi mer hei zu Lëtzebuerg hunn, da si mer e wesentleche Schrëtt virukomm, an et gëtt kee Bessere wéi den Nicolas Schmit, fir dat ze maachen!“

AUDIO: Den Dan Kersch iwwert de Nicolas Schmit

Nieft dem Dan Kersch war en Donneschdeg och de Premier Xavier Bettel frou iwwert d'Zréckbehale vun der Kandidatur vum Nicolas Schmit. D'Regierung hat den LSAP-Politiker jo fir e Posten an der Bréisseler Kommissioun virgeschloen.