No der Entrevue mam Lëtzebuerger Premier wollt de Boris Johnson sech net de Froe vun der Presse stellen. De Xavier Bettel stoung eleng Ried an Äntwert.

Stonnelaang Gespréicher ouni konkret Proposen, sou kann een d'Entrevue resuméieren, déi de britesche Premier Boris Johnson e Méindeg zu Lëtzebuerg hat. Anescht wéi geplangt, stoung de Lëtzebuerger Premier Xavier Bettel uschléissend allerdéngs eleng der Press Ried an Äntwert.

An dat huet och déi international Press vill kommentéiert

Waren et déi ronn 100 Demonstranten, déi hirem Frust nawell fräie Laf gelooss hunn oder de Faite, datt näischt ze soe war - de Boris Johnson ass no der Entrevue mam Xavier Bettel senger Wee gaangen an d'Riednerpult nieft dem Lëtzebuerger Premier blouf eidel. Och hien huet betount, datt ee sech Propositiounen erwaart hat, mä net krut.

VIDEO: Point Presse ouni Boris Johnson
No der Entrevue mam Lëtzebuerger Premier, wollt de Boris Johnson sech net de Froe vun der Presse stellen.

De Boris Johnson huet dem Xavier Bettel erkläert, datt et keen 2. Referendum wäert ginn an dat keng Méiglechkeet wier. Dem Lëtzebuerger Premier säi Wonsch wier en Deal. Et bräicht ee schrëftlech Proposen an net just Wierder.

Donieft huet de Lëtzebuerger Premier betount, datt d'Leit wësse missten, wat a 6 Woche mat hinne geschitt. D'Auer géing ticken, dat Ganzt wier en Albdram fir d'Leit a Groussbritannien.

De Boris Johnson huet awer englesche Medien e Statement no der Entrevue ginn.

Entrevue mam Jean-Claude Juncker a Michel Barnier

Nodeems de Boris Johnson an de Jean-Claude Juncker ronn 2 Stonnen zesummesouzen, sot den EU-Kommissiounspresident, datt d'Negociatioune weider géinge goen. De Jean-Claude Juncker sot och, hie géing e Mëttwoch de Moien eng Ried virum Europaparlament halen.

Den EU-Kommissiounspresident erënnert drun, dass et d'Responsabilitéit vu Groussbritannien ass, fir legal Solutiounen ëm de Brexit-Accord op den Dësch ze leeën. Weider ënnersträicht hien, dass d'EU-Kommissioun weiderhin oppen ass, fir virun allem Solutiounen ëm de Backstop ze fannen. Dëst ass bis ewell jo nach net geschitt.

© AFP

D'EU-Kommissioun betount, dass den EU-Sommet am Oktober ee wichtege "Meilesteen" am Prozess wäert sinn.

VIDEO: Kuerze Statement vum Jean-Claude Juncker
Nom Mëttegiessen zesumme mam Boris Johnson a Michel Barnier, huet de Jean-Claude Juncker sech kuerz un d'Presse geriicht.

Virum Zesummentreffen

Kee Kommentar iwwer eng Reunioun, déi nach net ugefaangen huet. Dat sot den EU-Kommissiounspresident Jean Claude Juncker viru sengem Mëttegiessen mam britesche Premierminister Boris Johnson a mam EU-Chefnegociateur Michel Barnier. Déi dräi Politiker hunn zesummen am Le Bouquet Garni an der Stad hannert dem Groussherzogleche Palais giess. Zerwéiert goufen, wéi et schéngt, Schlécken, Saumon a Kéis.

De Boris Johnson ass eng 10 Minutten nom Jean-Claude Juncker beim Restaurant bäigefuer. Op d'Fro vun der Presse, ob hien optimistesch wär, sot hie just "cautious", also virsiichteg. Op der Plaz waren eng 40 Journalisten a Kameraleit aus der internationaler Presse.

VIDEO: De Boris Johnson zu Lëtzebuerg
De britesche Premier ass fir Gespréicher mam Jean-Claude Juncker, Michel Barnier a Xavier Bettel am Grand-Duché.

Ma et hunn och Briten, déi zu Lëtzebuerg wunnen, demonstréiert. Si wëllen, dass Groussbritannien an der EU bleift a si mam Boris Johnson guer net averstanen. Hie soll ophalen mat léien, esou ee vun hire Messagen.

Ee Politiker, deen esou polariséiert, rifft natierlech och Géigner op de Plang. / © Domingos Oliveira / RTL

Entrée Boris Johnson
Nodeems de Boris Johnson an de Jean-Claude Juncker ronn 2 Stonnen zesummesouzen, sot den EU-Kommissiounspresident, datt d'Negociatioune weider géinge goen.

Brexit am Fokus

Am Mëttelpunkt vun de Gespréicher stoung den EU-Austrëttsaccord. De britesche Premier fuerdert Changementer, eppes wat d'Europäesch Unioun bis elo refuséiert huet. De Jean-Claude Juncker hat de Weekend nach eemol däitlech gemaach, dass op kee Fall een neien Accord ausgehandelt gëtt. Hien huet de Britte virgeheit, keng alternativ Proposen op den Dësch geluecht ze hunn.

Sollte sech béid Säiten net eens ginn, dreet de Boris Johnson mat engem net gereegelte Brexit Enn Oktober. Dat britescht Parlament ass géint een No-Deal-Brexit a fuerdert noutfalls eng weider Rallonge vum Austrëttsdelai bis Enn Januar bei der EU unzefroen. De Boris Johnson schléisst dat allerdéngs aus.

An der Emissioun Background hei op der Antenne sot de Xavier Bettel e Samschdeg am Virfeld vun der Visitt vun dësem Méindeg, dass et weder een Alternativplang nach een neien Delai géif ginn.

Ëmstridden ass d'Fro, wéi trotz dem Brexit eng fest EU-Baussegrenz tëscht Irland an dem briteschen Nordirland ka verhënnert ginn. D'EU ass weiderhin fir ee sougenannte Backstop, deemno am Noutfall ganz Groussbritannien an der EU-Zollunioun soll bleiwen.

Déi europäesch Organisatioun vun de Patronen, Business Europe, warnt virun engem EU-Austrëtt vu Groussbritannien ouni Accord. En No-Deal-Brexit wier eng Katastroph. En net gereegelten Austrëtt wier fir déi eenzel Säiten extrem schiedlech, heescht et vun der Organisatioun. Et ass den Appell u Groussbritannien an un d'EU, all erdenklech Efforten ze maachen an ee konstruktiven Dialog ze féieren, fir dat ze verhënneren. Business Europe erwaart, dass déi britesch Regierung realistesch Optiounen op den Dësch leet.