Vum 20. bis den 27. September organiséiert Youth for Climate an Zesummenaarbecht mat aneren Organisatiounen eng Rei Evenementer.

Zesumme wëlle si op d’Konsequenze vum Klimawandel opmierksam maachen. En Dënschdeg de Moie goufen d'Detailer virun der Presse presentéiert.

D'ONGen, Gewerkschaften an aner Organisatiounen, déi sech ënnert dem Titel "United for Climate Justice" zesummegedoen hunn, deelen zwou zentral Fuerderungen: D’Regierung soll de Klimanoutstand ausruffen an d’Konsequenzen op d'Klima an op d’Ëmwelt an all Decisioun mat afléisse loossen. Et soll donieft eng sougenannte "Klima-Justiz" etabléiert ginn, tëscht de Generatiounen, tëscht dem globalen Norden an dem globale Süden an tëscht Aarm a Räich. Zum Beispill andeems Fonge geschaf ginn, fir deene Leit, déi d’Konsequenze vun der Äerderwiermung fir d’éischt spieren, ze hëllefen.

Youth for Climate: Affer vu Klimakris mussen ënnerstëtzt ginn

Lëtzebuerg soll seng Zäregas-Emissioune bis 2030 op 0 reduzéieren, vun 2040 un zu 100 Prozent mat erneierbaren Energie funktionéieren an direkt mat den Investitiounen a fossil Brennstoffer ophalen. Dat fuerdert d'Schülerorganisatioun Youth for Climate am Virfeld vun engem Schülerstreik géint de Klimawandel dëse Freideg. Lëtzebuerg géif iwwerdeems net genuch géint d'Steierflucht op globalem Niveau maachen, seet d'Zohra Barthelemy, eng vun de Spriecherinne vu Youth for Climate.

AUDIO: Extrait Zorah Barthelemy

"Wéinst der Steierflucht ginn op der ganzer Welt enorm Zomme verluer, déi an d'Wuelbefanne vun der Bevëlkerung a vun der Äerd investéiert kéinte ginn. Eis Devise "Climate Justice" schléisst déi sozial a generatiounsiwwergräifend Justiz mat an. D'Klimakris betrëfft virun allem d'Länner am globale Süden an déi Jonk. Et mussen Infrastrukturen a Fonge kreéiert ginn, fir d'Affer vun der Klimakris séier an effektiv z'ënnerstëtzen."

Wann dës Fuerderungen net an deem aktuelle System ëmgesat kéinte ginn, da bréicht et e System-Wiessel zugonschte vun der Nohaltegkeet an der sozialer Gerechtegkeet.

Grouss Manifestatioun e Freideg, de 27. September

Nieft dem Schülerstreik dëse Freideg organiséiert Youth for Climate zesumme mat enger Rei ONGen, dorënner Votum Klima an Amnesty International, a mat de Gewerkschaften OGBL, LCGB a Landesverband, wärend enger Woch divers Evenementer. Zum Beispill eng Aktioun fir Dréck opzerafen, eng Konferenz an e Spillowend. Den Ofschloss vun der sougenannter "Week for Future" ass dann eng grouss Maniff e Freiden an enger Woch, erkläert de Frederic Krier vum OGBL.

AUDIO: Extrait Frederic Krier

"D'Iddi ass eigentlech, dass dann de 27. déi Erwuesse sech de Schüler uschléissen, also d'Generatiounen zesummekommen. An dat reflektéiert och wat um internationalem Plang op Opruff vu Fridays for Future, wou déi selwecht Woch och Aktioune geplangt sinn, an dee sougenannten Earth-Strike-Day, an och do maachen divers international ONGe mat, an och den internationale Gewerkschaftsbond."

No dëser Aktiounswoch wëllen d’United for Climate Justice-Organisatioune weider Evenementer am Januar an am Fréijoer organiséieren, huet et en Dënschdeg de Moien nach geheescht.