Um Dënschdeg ass de Lëtzebuerger Premier fir eng Aarbechtsvisitt beim franséische President Emmanuel Macron.

Bettel bei Macron a Phillippe
Um Dënschdeg ass de Lëtzebuerger Premier fir eng Aarbechtsvisitt beim franséische President Emmanuel Macron.

Déi europäesch Aktualitéit steet um Ordre du jour.

© Pierre Jans / RTL Télé Lëtzebuerg

De Lëtzebuerger Premier hat um Dënschdeg de Moie schonn eng Entrevue mat der Buergermeeschtesch vu Paräis Anne Hidalgo. Den Ëmfang war ganz häerzlech, wéi een op engem Video op Twitter gesäit. An de Gespréicher goung et ënnert anerem ëm d'Roll vu Stied am Kampf géint de Klimawandel, grad wéi ëm de gratis ëffentlechen Transport.

Duerno gouf de Xavier Bettel am Elysée vum Franséische President empfaangen. Offiziell um Programm stounge Preparatioune vun Europadossieren an dem nächste europäesche Conseil. Als Haaptsujet war och de Klima annoncéiert. Ma no der dach spezieller Visitt vum britesche Premier e Méindeg zu Lëtzebuerg goung awer och nach eng Kéier kuerz Rieds iwwert de Brexit, wéi de Premier Xavier Bettel am Interview mat RTL.

Béid Länner wëlle waarden, bis Groussbritannien en Text virleet, fir datt ee ka weiderschaffen. Et hofft een, datt ee mat engem Deal ka weiderfueren, well aktuell ass scho genuch Chaos an der Situatioun dran, dat och ouni en "No-Deal".

AUDIO: Extrait Xavier Bettel

En Dënschdeg an der Mëttesstonn war de Xavier Bettel dunn an de Matignon bei säin Homolog Edouard Phillippe agelueden. ''Et kann een och mat sengen Noperen diskutéieren, wann ee mat eppes net averstanen ass'', sot de Lëtzebuerger Premierminister. De meeschte Stroum a Frankräich kënnt nach ëmmer aus den Atomzentralen. Eppes, wat de Xavier Bettel net begréisst, Stéchwuert Cattenom. Fir dee Site hofft de Premier op e gemeinsame Projet fir nohalteg Energie. Eng einfach Aufgab dierft dat awer net ginn.

© Pierre Jans / RTL Télé Lëtzebuerg