24/24 ass d'Ekipp vum Péitrusshaus bereet, fir Jonker an Nout am Péitrusshaus opzehuelen, ähnlech wéi eng Urgence am Spidol.

Jonker tëscht 12 an 21 Joer kënne sech an enger Krisesituatioun, per Telefon oder sur place u si wenden an en Ënnerdaach a souguer eng Schlofméiglechkeet froen. De Service, deen d'Associatioun "Solidarité Jeunes" mam Péitrusshaus ubitt, ass eemoleg am Land. Keng aner Struktur erméiglecht eng op kuerz Zäit begrenzten Urgence-Opnam.

De Jonke ka bis zu 10 Deeg hei iwwernuechten, allerdéngs nëmme mam Accord vun den Elteren. Et ass deemno keng Plaz, wou déi Jonk sech kënne virun den Eltere verstoppen. Hei schafft déi multidisziplinär Ekipp vun Educateuren, Assistants sociaux a Psychologen drun zesumme mam Jonken an der Famill eng Léisung ze fannen. D'Zil ass de Retour Heem an d'Famill, ass dëst net méiglech, gi Foyeren oder och Internater proposéiert.

Wärend dem Openthalt am Péitrusshaus muss de Jonke weiderhin an d'Schoul goen a sech un d'Hausreegelen halen. Dobäi zielen ënnert anerem spéitstens um 18.30 Auer owes zeréck am Péitrusshaus ze sinn, all Owend zesumme ronderëm en Dësch ze iessen a keen Handy am Zëmmer.
D'Ekipp vum Péitrusshaus ass ënnert der gratis Hotline 8002 6002 ze erreechen.