Wéi et awer elo, wann och déi Autoen aus dem Parking sinn, mam Rousegäertche weidergeet, kann zu dësem Ament nach net gesot ginn.

De Méinden virun enger Woch huet de Parking Rousegäertche gebrannt, um minus 1 goung en Auto a Flamen op. Eng Stonn drop war d'Feier ënner Kontroll. Verletzt gouf keen , et blouf beim Materialschued

Eng Woch dono: Endlech goufen d'Leit informéiert, dass se hiren Auto nees kéinte siche kommen, wuel gesinn déi, déi net vun de Flamen betraff waren, ma Verschiddener hunn net verstanen, firwat dat esou laang gedauert huet .

De Parking Rousegäertchen ass ee vun deenen eelsten Parkingen am Land a gouf deemools esou agreéiert an autoriséiert. Um -1 ass nämlech keng Sprenkel-Anlag, a genee dëst gouf den Autoen zum Verhängnes.

Déi wichtegst Sécherheetsmesurë waren awer virun allem d’Kennzeechnung vun de Flucht Weeër, déi däerfen néierens feelen a hunn esou den Dag selwer de Leit am Parking de Wee nees no bausse gewisen.

Weider Mesuren si Co-Détecteuren, feiersécher Dieren, fir dass d'Feier sech net ausbreet,  Feierläscher a Brandschutzmaueren.

Déi meeschten Zäit geet awer elo am Pabeierkrich tëschent den Assurancen, den Experten , dem Exploitant an der Staat Lëtzebuerg drop. Déi Betraffe musse Gedold hunn a virun allem sech nei organiséieren ouni Auto.

Eng Situatioun déi den Ament bei jidderengem Gedold fuerdert , dobäi kënnt, dass hei, méi ewéi eng Assurance concernéiert ass, an dofir wäert et och nach laang daueren, bis een sech hei gëeenegt huet.

Iwwer 50 Pompjeeë ware lescht Woch am Asaz, et ware méiséileg Läschaarbechten, schonn eleng den Accès war limitéiert, fir d’Pompjeeë keen Alldag an ëmmer nees eng Erausfuerderung.

Reegelméisseg obligatoresch Kontrolle ginn hei zu Lëtzebuerg a sämtlechen ënnerierdesche Parkingen agehalen, an awer kann et zu esou trau rechen Tëschefäll kommen, wat zielt ass dass kee Blesséiert gouf. Wéini de Parking elo nees op geet , weess keen zu dësem Zäitpunkt, der Buergermeeschtesch Lydie Polfer no , gëtt alles esou séier ewéi méiglech gereegelt.

City Breakfast

43 Autoe konnten antëscht aus dem Parking Rousegäertchen erausgeholl ginn, 31 sinn nach um "Minus 1" geparkt. Dat huet d'Stater Buergermeeschtesch Lydie Polfer e Mëttwoch de Moien um CityBreakfast präziséiert, eng Woch nodeems et am ënnerierdesche Parking gebrannt hat. Wéi et mam Parking weidergoe soll, dorop hätt een aktuell nach keng Äntwert:

Extrait Lydie Polfer

Mir mussen elo kucken, wat alles misst gemaach ginn, wéi eng Konditioune mer missten erfëllen, wa mer géifen duerch eng "sommaire remise en état" dat nees opmaachen. An dat musse mer nach ofklären, och mat der ITM.

D'Fro wier zum Beispill, ob d'ITM e Sprinklersystem géif froen, ob d'Elektresch net anescht misst geluecht ginn, well haut nu mol aner Norme géinge gëllen, wéi virun 30 Joer. Deemno wat verlaangt gëtt, wier et sënnvoll, de Parking elo komplett ze renovéieren. An engem Mount misst een do méi wëssen, huet d'Lydie Polfer betount.

© Domingos Oliveira / RTL