Wéi d'Police mellt, krute sech e Samschdeg ëm 22 Auer zwee Autoen tëscht Esch/Uelzecht an Däitsch-Oth frontal ze paken. D'Police sicht no Zeien.

E Samschdeg den Owend koum et an der Rue d'Audun zu Esch/Uelzecht zu engem Accident tëscht 2 Autoen. Béid Chauffere goufen dobäi verwonnt, ee vun hinnen esou uerg, dass e vum Samu misst op der Plaz behandelt ginn. Am Asaz waren de Samu an d'Pompjeeë vun Esch/Uelzecht an d'Ambulanz aus dem franséische Grenzgebitt.

D'Gefier mat Lëtzebuerger Plack, dat aus Richtung Audun-le-Tiche koum, ass bei engem Iwwerhuelmanöver an enger Rietskéier mat engem Auto mat franséischer Plack kollidéiert, deen aus dem Grand-Duché gefuer koum. Den Alkoholtest ass beim Automobilist mat Lëtzebuerger Plack positiv ausgefall.

D'Police vun Esch sicht nom Autofuerer, deen an der Rietskéier iwwerholl gouf.

All Informatiounen oder Zeienaussoen iwwert dësen Accident si fir d'Police ënnert der Telefonsnummer 244 501 000.

Accident tëscht Esch/Uelzecht an Audun-le-Tiche / © Sdis 54

Weider Accidenter vun e Samschdeg op e Sonndeg

Géint 17 Auer si 4 Autoen um Gaasperecher Kräiz kollidéiert. Eng Persoun gouf verwonnt. D'Ambulanz an d'Pompjeeën aus der Stad an de CGDIS vun Hesper waren op der Plaz.

De Bilan vum Accident tëscht Tandel a Furen géint 23.45 Auer ass 1 Blesséierten. D'Ambulanz vun Ettelbréck an d'Pompjeeë vun Tandel waren op der Plaz.

Ee Blesséierte gouf et no 3 Auer an der Nuecht zu Gousseldeng an der Mierscher Strooss bei enger Kollisioun tëscht engem Auto an enger Mauer.

E Sonndeg de Mëtteg kuerz no 12 Auer waren zu Bierchem een Auto an e Motorrad net laanschtenee komm. Hei gouf eng Persoun blesséiert.

Um 13.50 Auer war op der N7/Sortie Miersch een Auto op d'Kopp gaangen. Den Automobilist gouf blesséiert.

Soss nach am Bulletin vum CGDIS

Um Houwald ass eng Persoun um 17.15 Auer vun engem Auto ugestouss ginn. Och hei gouf ee Mënsch verwonnt. Sur place waren d'Ambulanz aus der Stad an d'Pompjeeë vun Hesper.

Gebrannt huet et e Samschdeg den Owend tëscht Bënzelt an Ëlwen. E landwirtschaftlecht Gefier huet kuerz virun 20 Auer Feier gefaangen. Zu Schued koum bei dësem Virfall keen. D'Pompjeeë vun Ëlwen a Wäiswampech hu gehollef, fir de Brand ënner Kontroll ze kréien.

Führerschäiner agezunn

An der Nuecht vun e Samschdeg op e Sonndeg hu véier Persounen hire Führerschäin mussen ofginn, well si ënner Alkoholafloss gefuer sinn. Dëst war de Fall zu Bäreldeng, am Tunnel Grouft, zu Baastenduerf an zu Féiz an der Rue Brill.