Déi lescht Woch hunn hei am Land jo erëm d’Schoulen ugefaangen an dat bedeit fir d’Schüler natierlech erëm eng ganz Rei un Ëmstellungen an hirem Alldag.

Och an den Internater war Rentrée. Eleng am leschte Joer ware ronn 600 Schüler a sou Ariichtungen hei zu Lëtzebuerg ageschriwwen.

Mir begleeden dˋClaire, eng Schülerin am Fieldgen, bei sengem éischten Dag am Internat. Nach een Dag virun der offizieller Rentrée kommen dˋInternatschüler un. D’Claire a 77 aner Meedercher kréien dann hir Kummere gewisen. Dat ass hiert neit doheem fir de Rescht vum Joer, op d'mannst vu méindes bis freides.

Et gëtt vill verschidde Grënn wisou déi Jugendlech do sinn. Fir déi eng sinn et d’Frënn, fir anerer ass et de kuerze Schoulwee. Dacks ass et och, well si bei den Hausaufgabe gehollef kréien. Ënnert anerem dofir sinn déi 13 Educateuren zoustänneg. Donieft bidde si och Fräizäitaktivitéiten un, esou gëtt zum Beispill zweemol d’Woch zesumme gekacht.

Nom ariichten an auspaken, gëtt zu Owend giess an da geet den Dag och schonn op een Enn. D’Schüler schlofen déi éischte Kéier fir dëst Schouljoer hei, déi éischt Nuecht vu villen.