Virun 3 Deeg hate mir gemellt, dass tëscht dem Boulevard Kennedy Nummer 75 an der Rue des Muguets all méiglechen Offall géing leien.

Dorënner och Fläsche mat gëfteger Isolatiounsflëssegkeet a Säck mat Isolatiounsmaterial. Mat dobäi och ee Schëld mat der Opschrëft "Luxtram schafft hei".

Mir hate bei den zoustännegen Autoritéiten, der Ëmweltverwaltung, Luxtram an dem Fonds Kirchberg nogefrot, wien dofir zoustänneg ass.

Vu Luxtram hat et geheescht, si géifen der Saach seriö nogoen. Och d'Ëmweltverwaltung huet annoncéiert eng Enquête ze maachen an déi Responsabel vu Fonds Kirchberg hu beim "Ponts et Chaussées Kirchberg" nogefrot, déi Kontakt mat der Firma opgeholl hunn. Fonds Kirchberg präziséiert, dass si net dofir responsabel sinn, mä d'Baufirma.

Knapp 2 Deeg méi spéit goufen d'Palette mat den Isolatiounsflëssegkeeten ewechgeholl. Nom 3. Dag war och de Rescht vum Offall fort an d'Plaz nees propper.