Et gouf am Kader vun enger Affär ronderëm d'Sécherheetsfirma „Security-Service-Schmitt“ effektiv eng Perquisitioun op der Stater Gemeng.

De Presseservice vun der Justiz huet eis um Méindeg de Moien eng entspriechend Informatioun vum Radio 100,7 confirméiert. Dobäi goung et, de Kollegen no, ëm eventuell onerlaabten Iwwerwaachungs- a Gardiennageaktivitéiten op der Schueberfouer.

Och d'Stater Buergermeeschtesch Lydie Polfer confirméiert, datt et zejoert am Juli eng Perquisitioun op der Stater Gemeng gouf. Si selwer wier awer net gehéiert ginn, sou d'Buergermeeschtesch.

Et géing ëm d'Definitioun vun den Aktivitéite goen an ob dës eng Autorisatioun vum Justizministère bräichten.

2015 koume Froen an der Chamber dozou. De Félix Braz hätt geäntwert, datt d'Aktivitéiten, déi d'Firma fir d'Gemeng op der Schueberfouer maachen, net géingen dorënner falen, erkläert d'Lydie Polfer.

D'Stater Buergermeeschtesch Lydie Polfer (1)

Et hätt een als Gemeng déi Firma engagéiert fir Aktivitéiten am Beräich „évènementiel“ an et hätt een also keng Autorisatioun gebraucht, et wier ëm de sougenannte „crowd management“ gaangen.

D'Lydie Polfer géif och dervunner ausgoen, datt d'Firma déi Engagementer agehalen huet.

Aner Leit géingen dat wuel a Fro stellen an hätte Plainte gemaach. Et wier dann elo un der Justiz, fir dat ze klären, d'Instruktioun leeft jo nach.

Trotzdeem hätt een als Gemeng scho méi laang decidéiert, fir net méi mat Security-Schmitt zesummenzeschaffen.

"Wann eng Perquisitioun kënnt an et ass eng Instruktioun am Gaang, da muss ee mat Precautioun weiderfueren.", esou d'Lydie Polfer.

D'Stater Buergermeeschtesch Lydie Polfer (2)

Déi genannte Firma wier duerno awer trotzdeem weider op der Fouer präsent gewiescht, well se vu privaten Acteuren engagéiert gouf.

D'Buergermeeschtesch weist sech iwwerdeems iwwerrascht, datt de Sujet grad elo zum Thema gouf. Dat alles wier näischt Neies an d'Affär géif op e puer Joer zeréckgoen.

D'Sécherheetsfirma hätt viru Joren am Optrag vun der Stater Gemeng do Leit a Buden iwwerwaacht, ouni dofir déi néideg Autorisatioun vum Justizministère ze hunn.

An deem Kontext géif sech d'Fro stellen, ob och de Stater Schäfferot an déi zoustänneg Gemengebeamten eng Responsabilitéit hunn, well si d'Kontrakter mat „Security-Service-Schmitt“ ënnerschriwwen hunn.

Eisen Informatiounen no wier an deem Zesummenhank iwwregens och eng Perquisitioun beim Ex-Fouermeeschter Marc Weydert doheem gemaach ginn. Dës Nouvelle dementéiert awer de Parquet um Méindeg am spéiden Nomëtteg.