Bannent den nächste Méint kënnt et RTL-Sourcen no zu engem weidere Remaniement bannent der Dräier-Regierung.

Nodeems d'Sam Tanson de Justiz-Portefeuille vum schwéierkranke Felix Braz iwwerholl hat an doropshinn den Henri Kox als neien grénge Logementsminister an d'Regierung nogeréckelt ass, sinn et och lo och d'Ressorte vum Vize-Premier Etienne Schneider, déi mussen ersat ginn. Op eiser Antenn hat den Etienne Schneider virun zwou Woche confirméiert, datt hie säi Mandat fréizäiteg, also virun de Chamberwalen 2023, opgëtt.

An dee Changement dierft net méi all ze laang op sech waarden loossen:

RTL-Informatiounen no sinn partei-intern d'Gespréicher um héchste Niveau amgaangen, wie wäert am LSAP-Generalrot proposéiert ginn, fir Successeur vum Minister Schneider ze ginn.

Dobäi gëtt sech och iwwerluecht, fir d'Ressorte vum Etienne Schneider op verschidde Politiker opzedeelen, notamment geet et jo och ëm de Vize-Premier-Posten.

Eng vun de Pistë wier, nieft dem Parteipresident Franz Fayot den Zweet-Gewielte Marc Angel an d'Regierung noréckelen ze loossen.

Den Nach-LSAP-Deputéierten, dee jo soll Europadeputéierte ginn, sot effektiv am 100,7-Interview, datt hie sech géif op d'Aarbecht zu Bréissel a Stroossbuerg freeën. Hie wollt awer net ausschléissen, datt hien nach am Laf vun der Legislaturperiod zréck op Lëtzebuerg kënnt, fir den Etienne Schneider an der Regierung z'ersetzen.