Et lafen informell Gespréicher tëschent de Majoritéitsfaarwen an der gréisster Oppositiounspartei, soudatt ee Konsens fonnt kéint ginn.

Léisst d'CSV d'Iddi vum consultative Referendum falen?

A punkto Verfassung koum ee sech nämlech méi no, informell Gespréicher tëscht de Majoritéitsfaarwen an der CSV wiere konstruktiv verlaf an déi gréisst Oppositiounspartei weist sech ënner Ëmstänn bereet, zeréck mat op den urspréngleche Wee ze goen.

CSV-Revirement a Punkto Verfassung / Rep. Pit Everling

Den CSV-Revirement virun der Summervakanz war schonn eng Iwwerraschung. Déi gréisst Oppositiounspartei hat domadder gedreet, de Konsens-Text net méi wëlle matzestëmmen. D'CSV huet par Konter e consultative Referendum iwwer eenzel Froe verlaangt. Déi aner Parteien hu wéineg Versteesdemech gewisen.

Am Hierscht elo schéngt d'Äis ze briechen, war en Dënschdeg no der Institutiounekommissioun gewuer ze ginn. De President vun där Kommissioun, den LSAP-Fraktiounschef Alex Bodry:

"D'CSV ass am Gaangen an deem Kontext, hir Positioun ze iwwerdenken, dat opgrond vun den Diskussiounen, déi mer haten. An do gëtt elo dono gekuckt, ob un deem Projet ka festgehale ginn oder ob een op een neie Wee geet. Mä dat wäert sech an den nächsten 2-3 Wochen erausstellen."

Den CSV-Deputéierte Léon Gloden confirméiert Ouverturen, allerdéngs vis-à-vis vun der CSV: "Et ginn Ouverturë vun den anere Parteie par Rapport zu der Positioun vun der CSV."

Déi aner Parteien hätten d'Suerg vun der CSV verstanen, op alle Fall wier een ënner Ëmstänn prett, fir nees mat an d'Konsens-Boot ze klammen, ënnersträicht de Léon Gloden:

"Wa mer op dem konstruktive Wee, deen ageschloe ginn ass, an där Ronn kënne virukommen, da kann d'CSV sech virstellen, dee consultative Referendum an där Form vläicht net méi ofhalen ze mussen."

An den nächsten Deeg gëtt et eng weider Gespréichsronn. Datt d'CSV zeréckgeruddert wier, ass ze begréissen, sou nach den DP-Fraktiounschef Eugène Berger.

Beim Timing krut een natierlech bësse Retard, eigentlech hätt elo am Hierscht déi grouss Informatiouns-Campagne scho sollten ulafen.

Den Deputéierte vun déi gréng, Charles Margue gouf iwwerdeems als neie Co-Rapporter vum Gesetzprojet iwwert d'Verfassungsreform nominéiert. Hien ersetzt den Henri Kox, dee jo an d'Regierung gewiesselt ass. Jiddwer Partei stellt ee Co-Rapporter. Fir d'LSAP ass dat den Alex Bodry, fir d'DP d'Simone Beissel, fir d'CSV de Léon Gloden an nei fir déi gréng, de Charles Margue.