An de Reie vun déi Gréng gouf eng nei Deputéiert vereedegt. Déi 31 Joer al Chantal Gary réckelt fir den Henri Kox an d'Chamber no.

D'Mandat bleift u sech an der Famill. Déi nei Volleksvertriederin ass nämlech d'Niess vum neie Logementsminister.

An hirer éischter Ried sot d'Chantal Gary, datt d'Mobilitéit ee vun hire Kärthemen ass. Si huet ënnerstrach, datt an hiren An e multimodaalt Mobilitéitsverhalen néideg ass. Aner Kärtheme si fir déi nei Deputéiert d'Landwirtschaft an de Wäibau, esou wéi dat sech fir eng Politikerin aus dem Bezierk Oste gehéiert.

Éischt Ried vum Chantal Gary an der Chamber

No der Semiray Ahmedova ass d'Chantal Gary dat zweet neit Gesiicht fir déi gréng um Krautmaart. Déi jonk Hobby-Wënzerin war bei de leschte Chamberwalen Drëttgewielt am Osten, direkt hannert dem Henri Kox.

Serie Nei Deputéiert: Chantal Gary
D’Chantal Gary ass eng vun den zwou jonke grénge Politikerinnen, déi elo am Hierscht an d’Chamber noréckelt.

Weider Themen um Krautmaart:

No hirer Vereedegung war eng Froestonn un d'Regierung virgesinn. Den LSAP-Deputéierten an Diddelenger Buergermeeschter Dan Biancalana huet eng Fro am Kontext "question élargie" iwwert d'Filmindustrie gestallt an den CSV-Deputéierte Marco Schank eng Fro am Kader vum nationalen Aktiounsplang iwwert den Handicap. Ee weidere Punkt um Ordre du Jour war eng Aktualitéitsstonn, déi d'CSV ugefrot huet, iwwert den Drëtten Alter am Grand-Duché.

Chamber 23.10.19

Callcenter fir d'CNS
Wärend der Froestonn gouf och iwwert d'CNS geschwat. Et war ënnert anerem d'Kritik, dass d'Gesondheetskeess dacks net telefonesch ze erreechen ass. De Sozialminister Romain Schneider huet dëse Problem op déi héich Zuel un Assuréeën zeréckgefouert. Aktuell wieren dat ronn 800.000. Et war d'Annonce vum zoustännege Minister, dass ee Callcenter soll agefouert ginn, fir op dëse Problem ze reagéieren.

Aus OLAI gëtt ONA
Donieft hunn déi Deputéiert nach iwwert eng Rei Gesetzespropositiounen ofgestëmmt. Mat 56 Jo-Stëmmen hunn d'Deputéiert e Gesetz ugeholl, mat deem den OLAI duerch den ONA ersat gëtt. Dem Office luxembourgeois de l'acceuil et de l'intégration (OLAI) seng Kompetenze ginn op déi zwee Ministèren opgedeelt, déi hei betraff sinn, dat heescht den Ausseministère an de Ministère fir Famill an Integratioun. Duerch den Office national de l'accueil (ONA) sollen et am Opnamprozess 3 gréisser Verbesserunge ginn, sot de Rapporter Max Hahn.

Réimervilla zu Schieren
En anere Sujet an der Chamber war d'Réimervilla zu Schieren. D'Kulturministesch Sam Tanson huet ënnerstrach, datt de Site, op deem d'Réimervilla steet, derwäert ass, erhalen ze ginn.