An der Chamber war en Dënschdeg den ëffentlechen Debat iwwert d’Petitioun Nummer 1319, iwwert d’Recht fir de Client op Krunnewaasser am Horesca-Beräich.

Se hat 5.114 Ënnerschrëfte kritt a gouf en Dënschdeg ëffentlech an der Chamber debattéiert: d'Petitioun iwwer e Gesetz, dat garantéiere soll, dass ee Krunnewaasser a Restauranten a Bistroe bestelle kann.

Esou vill ass kloer, e Gesetz kënnt elo mol net. D'Konklusioun vun der Chamber nom Debat ass parteiiwwergräifend déi hei: d'Politik soll an enger éischter Phas op Sensibiliséierung setzen, de Bols bei de Patronen aus dem Secteur mat enger Campagne fillen. Duerno muss de Bilan gezu ginn. Wann d'Patronen net géife matzéien, da misst och legiferéiert ginn.

Dem Petitionär David Kieffer vun der Associatioun ''Refill Lëtzebuerg'' war et wichteg ze betounen, dass si keen ''gratis'' Krunnewaasser fuerderen. Hinne géing et prioritär ëm den ekologeschen Aspekt goen. Krunnewaasser wär eben däitlech méi ëmweltfrëndlech ewéi dat aus de Fläschen. E Gesetz kéint iwwerdeems als e Sigel vun der Regierung verstane ginn, dat fir d'Qualitéit vum Lëtzebuerger Krunnewaasser. Et kéint Barrièren an de Käpp vun de Leit ewechraumen.

D'Deputéiert hu gréisstendeels mat der Iddi sympathiséiert, d'Drénkwaasser aus dem Krunn ze promouvéieren, ëmmerhi wär et zu Lëtzebuerg exzeptionell propper. D'Regierung, déi vun der Ministesch fir de Konsumenteschutz Paulette Lenert an dem Minister fir de Mëttelstand Lex Delles vertruede war, wëll zäitno eng Sensibiliséierungscampagne lancéieren, schwätzt sech an enger éischter Phas awer géint e gesetzleche Kader aus.

De Petitionär David Kieffer huet sech duerno op Nofro hin enttäuscht gewisen, dat wär näischt Konkretes an hien a seng Leit wären och net invitéiert ginn, aktiv un där Campagne matzeschaffen.

D'Äntwert vum Gastronomie-Secteur ass eng pragmatesch. De President vun der Horesca François Koepp sot den Dënschdeg de Moien am RTL-Interview, de Client géif d'Musek maachen.

Wann eng Demande do wär, géif de Secteur reagéieren. Allerdéngs géifen d'Margen hautdesdaags mat engem Mix aus Iessen an Drénke berechent ginn. Virausgesat, d'Restauranten a Caféë géifen de Clienten, wéi dat a Frankräich de Fall ass, gratis Krunnewaasser ubidden, da misst een dat eventuell op anere Plaze kompenséieren.

Wat halen d'Restaurateuren dovunner?

"De Präis vum Krunnewaasser wäert dann net vill méi bëlleg si wéi eng Fläsch, well dat, wat de Präis ausmécht, ass net d’Waasser u sech, mä alles, wat ronderëm ass.", esou den Emile Calmes vun der Brasserie du Cercle.

"De Restaurateur bezilt d’Waasser, de Service a vläicht och Karaffen, déi extra dofir kaaft ginn. All Service muss facturéiert ginn, mä wann dat esou ass, da si mir net dogéint.", betount den Hubert Bonnier, Le Place d’Armes.

"Wann d'Krunnewaasser dann zum Beispill 1 Euro kascht, amplaz vun 3 oder 4 Euro, da kann ech mir dat gutt virstellen.", mengt de Georges Sietzen vum Banana's.

Et wieren éischter auslännesch Touristen, déi an de Restauranten no Krunnewaasser froen. Esou nach weider Restaurateuren aus der Stad. Fir d‘Horesca wier e Gesetz net déi beschte Léisung.