"Wat d'Patronat eis méi de Réck dréit, wat mir méi no beienee réckelen", dat ee vun den Haaptmessagen, wéi gëeent géint d'UEL protestéiert gouf.

Déi dräi grouss Gewerkschaften zu Lëtzebuerg, CGFP, dem LCGB an dem OGBL, hunn en Dënschdegowend gëeent géint d'Patronatsvertriedung UEL protestéiert. Iwwer 2.000 Salariéeën a Beamten hate sech am Parc Hotel Alvisse zesummefonnt.

Profestmanif géint d'UEL / Reportage Pierre Jans

Ausléiser fir dës grouss gemeinsam Protestmanifestatioun war de rezent geäusserte Wonsch vum Patronat, datt  politesch Konsequenzen op d'Aarbechtsrecht aus dem Comité Permanent pour l'Emploi erausgeholl ginn. D'Gewerkschafte schwätze gëeent vun engem ''Boykott'' vun der Tripartite, engem gesetzlechen Organ, dat fir de soziale Fridden zu Lëtzebuerg gesuergt hätt, an dat elo liichtfankeg vun der UEL op d'Spill géif gesat ginn.

D'Patronatsvertriedung géif domat de Lëtzebuerger Sozialmodell futtimaachen an d'Aarbechtsrecht mat Féiss trëppelen, sot zum Beispill den LCGB-President Patrick Dury. De President vun der Staatsbeamtegewerkschaft Romain Wolff huet betount, et géif keen de Sozialdialog an engem Land, deem et gutt geet, a Fro stellen, dee mat gesondem Mënscheverstand agéiere géif.

An den André Roeltgen, President vum OGBL, fuerdert d'Regierung op Faarf ze bekennen an en neit Gesetz fir Kollektivverträg auszeschaffen. Anescht ewéi d'UEL behaapte géif, wären d'Kollektivverträg dat richtegt Instrument fir eng nei digital Aarbechtswelt.

Haart Wierder vun de Gewerkschaften a Richtung Patronat. Gläichzäiteg hu sech OGBL, LCGB an CGFP der UEL géintiwwer awer verséinlech gewisen. D'Patronat sollt zeréck op den Verhandlungsdësch kommen, esou d'Gewerkschaften.

Op der Protestmanifestatioun hunn d'Gewerkschafte sech an deem Kader och fir en Aarbechtsrecht 4.0 ausgeschwat, dat eben op déi modern Aarbechtswelt mat neien Erausfuerderungen a Schwieregkeete fir d'Salariéeën zougeschnidde wär.

"Kommt a verdeedegt d’Rechter vun de Leit, déi schaffe géint dës Attack vum Patronat"

Hannergrond ass jo d‘Annonce vun der UEL vu Mëtt September, an Zukunft net méi wëllen am Comité permanent du Travail et de l’emploi iwwert Reform ze verhandelen.

Vun de Gewerkschafte gëtt dat als eng Zort Kënnegung vun der Sozial-Partnerschaft gewäert, ëmsou méi, well d’Patronatsvereenegung oppen annoncéiert huet, datt si net méi vill vun engem Tripartite-Verhandlungs-Modus fir d‘Zukunft hält.

"Kommt a verdeedegt d’Rechter vun de Leit, déi schaffe géint dës Attack vum Patronat", housch et an der Invitatioun vun den 3 Gewerkschafte fir de Protestpiquet.