Um Dënschdeg goufen et grouss Problemer, wann ee mat der Bancomatskaart bezuele wollt. Dat huet eis SIX Payment Services bestätegt.

De Problem ass um 8.54 Auer ugaangen, wouduerch Bezuele mat der Bancomatskaart am ganze Land problematesch, bis onméiglech war. Verschidde Butteker hate sech bei RTL gemellt, fir op de Problem opmierksam ze maachen.

Wéi SIX Payment Services matdeelt, gouf de Problem séier fonnt a vun 9.32 Auer un wier de System lues a lues nees ugelaf. All hir Experte hätten dru schaffen, fir dass d'Bezuele mat der Bancomatskaart nees sou séier wéi méiglech an alle Butteker funktionéiert. Dat kéint awer eng Zäitchen daueren, well immens vill Transaktiounen ze verschaffe wieren.

SIX Payment Services huet um 13.48 Auer matgedeelt, dass all d'Zerwisser nees normal funktionéiere géifen a si entschëllege sech fir Onannehmlechkeeten, déi Clienten an Händler duerch dësen technesche Problem haten.