D'CSL hält an hirem Avis iwwert de Staatsbudget ënner anerem fest, dass d'Ongläichheeten an d'Aarmut am Land zouhuelen.

Lieft Lëtzebuerg ënner senge Moyenen? Sou ass der Chambre des Salariés hiren Avis zum Staatsbudget fir dat anert Joer iwwerschriwwen, en Avis, deen en Donneschdeg de Moie presentéiert gouf.

D'CSL hält doran ënner anerem fest, dass d'Ongläichheeten an d'Aarmut am Land zouhuelen. D'Aarbechterkammer setzt sech virun deem Hannergrond z.B. dofir an, dass d'Familljeleeschtungen un d'Präisser an un d'Paien ugepasst ginn, a stellt fest, dass d'Donnéeë vum Budgetsprojet den 3 ugekënnegte Prioritéite vun der Regierung - Klimaschutz, Investissementer an d'Zukunft a Verbesserung vum deegleche Liewen - net entspriechen.

© Didier Weber

De Sylvain Hoffmann, Direkter vun der Aarbechterkummer, huet dobäi ënnerstrach, dass et bei den Associatiounen, déi sech ëm sou Leit këmmeren, ëmmer méi Zoulaf gëtt vu Persounen, déi Problemer hunn, ee Beispill erausgepickt:

Extrait Sylvain Hoffmann

Well eng 30% vun de Leit Problemer hätten, fir d'Enner beieneen ze kréien, misst d'Politik ë.a. méi maache bei de Sozialausgaben, sou de Sylvain Hoffmann.

Fir den CSL-Vize-President Jean-Claude Reding ass et erschreckend, dass sech souvill Leit mussen op Servicer an Associatioune stäipen, fir iwwert d'Ronnen ze kommen. Dat wär net acceptabel. D'selwecht wéi beim Chômage dierft ee sech net domat offannen, datt Leit an eng Wanteraktioun oder an Epiceries sociales goe mussen an et wier scho guer net acceptabel, dass ëmmer méi Leit keen Dag iwwert dem Kapp hunn.

De Grand-Duché läit z.B. bei de sougenannten "Working poor", also deene Leit, déi aarm sinn, obwuel se schaffen, 5 Prozentpunkten iwwert der Moyenne vun der Eurozon.