Nodeems e Samschdeg den Owend direkt op 2 Plazen op der Musel Autoe gebrannt hunn, mécht d'Police en Zeienopruff.

Op der Musel haten d'Pompjeeën et e Samschdeg den Owend zweemol mat engem Auto a Flamen ze dinn. Dat war eemol de Fall um 19.40 Auer op der Esplanade zu Réimech an eemol um 21.45 Auer an der Muselstrooss zu Bech-Maacher. Wéinst dëse Bränn huet d'Police um Sonndeg de Moien dann och en Zeienopruff lancéiert. Eng Fra hat gesinn, dass d'Pneue vun engem Liwwerwon um Parking vun der Schwämm zu Réimech géife brennen. Och den Auto niewendru gouf beschiedegt. Gutt zwou Stonnen drop hat dann och e Liwwerwon gebrannt, déi Kéier zu Bech-Klengmaacher.

Eventuell Zeie solle sech w.e.g. bei der Police zu Réimech mellen (Tel: 244 77 1000).

Um 20.15 Auer waren d'Pompjeeën nach zu Biergem an der Schëfflenger Strooss am Asaz. Do hat eng Schminni Féier gefaangen.

Accidenter

Zwee Blesséierter gouf et bei engem Verkéiersaccident um 17.50 Auer zu Esch an der rue du X Septembre. Hei waren zwou Ambulanzen vun Esch am Asaz, de Samu an d'Pompjeeë vun Esch a Schëffleng.

Kuerz virun 19 Auer dann en Accident zu Housen op der Haaptstrooss. Eng Persoun gouf verwonnt. Och hei huet de Samu mussen an den Asaz. Ënnerstëtzt gouf dee vun de Pompjeeë vun Housen a Weiler, grad wéi vun enger Ambulanz vun Housen.

Ee Blesséierte gouf et bei engem Verkéiersaccident um 20.20 Auer um Kierchbierg bei der Luxexpo. D'Pompjeeën an d'Ambulanz aus der Stad hu sech ëm de Verwonnte gekëmmert.

E Sonndeg de Moien huet et géint 9.35 Auer um Boulevard de la Foire an der Stad gerabbelt. Hei waren 2 Autoen involvéiert an 2 Persoune goufe blesséiert. D'Pompjeeën an d'Ambulanz aus der Stad waren op der Plaz.