Op der Nordstrooss koum et géint 5.30 Auer zu enger Massekarambolage. D'Police schwätzt vun 1 Blesséierten, de CGDIS vun zwou Persounen.

Wéi d'Police mellt, krute sech am Ufank vun der A7 Richtung Stad am Ganzen 9 Autoen ze paken. D'Autobunn war tëscht Schieren a Colmer-Bierg komplett gespaart a Richtung Stad.

Am Beruffstrafic koum et am Beräich vun Ettelbréck zu gréissere Perturbatiounen a Stau.

D'Autobunn war scho viru 6 Auer gespaart ginn. Um 8.44 Auer huet den ACL gemellt, dass den Accident geraumt wier.
Am Asaz waren d'Ambulanze vun Ettelbréck an aus der Fiels, grad ewéi d'Pompjeeë vu Biissen, Colmer-Bierg a Schieren.

Och soss am Land ass et plazeweis zimmlech glat op de Stroossen, nodeems et e Sonndeg geschneit huet an et iwwer Nuecht gefruer ass.

Et heescht oppassen. D'Streedéngschter sinn ënnerwee.