De Comité permanent pour le travail et l’emploi, CPTE, hat no wochelaangen Tensiounen eng Reunioun. Et wier d’Ufanksphas vun enger grousser Diskussioun.

Nieft dem Aarbechtsminister Dan Kersch souzen och Familljeministesch Corinne Cahen, d'Patronatsvertriedung UEL , d'Gewerkschaften, an d'ADEM mat um Dësch.

Et wier d'"Ufanksphas vun enger grousser Diskussioun iwwert dat, wat am Regierungsprogramm steet an eng Rei aner Sujeten", sou den Aarbechtsminister no der Reunioun. Den Dan Kersch sot, et géing eng ganz Rei Theme ginn, "déi an nächster Zäit op eis duerkommen a wou mer mussen eist Aarbechtsrecht, eisen Aarbechtsmarché wëlle moderniséieren". Ob scho konkret eenzel Punkten wéi Deelzäitaarbecht, Télétravail oder Kollektivvertragsrecht ugeschnidde goufen, war net gewuer ze ginn. Et wier awer nach vill ze fréi, fir elo schonn iwwer Texter oder soss eppes ze diskutéieren.

Dem Dan Kersch no géing et drëms goen, all d’Positioune méi no zesummenzebréngen. Dat wier an der Vergaangenheet Mol gelongen a wann net, dann hätt d'Politik hir Verantwortung geholl. Et wéisst awer "jiddereen" viru wéi enger Verantwortung e géing stoen, sou nach de Minister.

Reunioun vum CPTE - Reportage Nico Graf

All d’Parteie ware sech eens ginn, datt no der Reunioun just de Minister sech ëffentlech ausdréckt. Iwwert d’Ambiance sot den Dan Kersch se wier par Rapport zu de leschten Wochen "relativ gutt" gewiescht.