Mat enger Zoustëmmung vu ronn 76,2% gouf um ausseruerdentleche Kongress "d’Intensivéieren an d’Ofséchere" vun der Zesummenaarbecht mam OGBL guttgeheescht.

Ronn 76,2% dofir, 17,1% dogéint a 6,7% Enthalungen: Dat war d'Resultat e Méindeg um ausseruerdentleche Kongress vum Landesverband, zur Fro, ob een d'Zesummenaarbecht mam OGBL intensivéieren an ofséchere wéilt. Domat sinn emol beim FNCTTFEL d'Weiche gestallt, fir an den Onofhängege Gewerkschaftsbond integréiert ze ginn. Virun eppes méi wéi zwee Joer hat ee beim Landesverband en éischte wichtege Schrëtt an déi Richtung gemaach.

AUDIO: Landesverband / Reportage Eric Ewald (3.12.19)

De President Georges Merenz huet drun erënnert, dass d'Verbandsleedung am Oktober 2017 den Optrag krut, Gespréicher mam OGBL ze féieren.

An deem Kontext war en Dënschdeg virun enger Woch e wichtegen Datum. Dee vum Landesverband war e Méindeg, dee vum OGBL ass e Freiden an e Samsdeg. Gëtt och dee gréng Luucht, da kënnt et vum nächste Juli bis Dezember 2024 fir d'éischt zu enger provisorescher Integratioun - woubäi Enn 2022 Bilan gezu gëtt, ier dann Enn 2024 d'Decisioun fält iwwer eng definitiv Integratioun. Et hätt een d'Objektiv, d'Gewerkschaftsbeweegung ze stäerken, well och d'Patronat zesumme schafft, huet de fréiere President Nico Wennmacher gemengt. Deen aktuelle Georges Merenz kéint zwar am Mäerz dat anert Joer an d'Pensioun goen, huet awer wëlles, säi Mandat bis 2024 z'erfëllen.

De President Georges Merenz sot viru knapp zwou Wochen am RTL-Interview, de Landesverband géif et ëmmer ginn. Opléise géif ee sech net. Mä fir gestäerkt ze ginn, géif et ëm eng Zesummenaarbecht mam OGBL goen, dat ouni déi eegen Identitéit ze verléieren. Et bléif een awer eng autonom Gewerkschaft, sou de President. Op d'Fro hin, ob et dann e Méindeg zu kontroversen Diskussioune koum, huet de Georges Merenz geäntwert, et wär alles duerchgeschwat ginn. Woubäi d'Gefill, dass dem Landesverband seng Eegestännegkeet géif verluer goen, awer aus der Welt geraumt gi wär.