Vun e Freideg op Samschdeg war nawell vill lass op eise Stroossen. 6 Mol hat et gerabbelt, eleng op der A13 gouf et een Accident mat 3 Blesséierten.

Um 17.30 Auer mellt de CGDIS en éischten Accident. Zu Keel an der Téitenger Strooss krute sech 2 Ween ze paken, woubäi eng Persoun verwonnt gouf.

Op der N26, Noutem an Direktioun Béiwen, ass en Auto um 21.50 Auer an de Gruef geroden.

D'Police präziséiert an hirem Bericht, dass de Chauffer probéiert hat Wëld auszewäichen. Hie koum vun der Strooss of, krut e Bam frontal ze paken a säin Auto gouf doropshin en Hiwwel erofgeschleidert.

Den Ongléckleche konnt sech selwer aus dem Wrack befreien an huet sech bei en Haus geschleeft, fir do ëm Hëllef ze froen. D'Hausbewunner hu sech ëm de Blesséierte gekëmmert, bis d'Rettungsdéngschter op der Plaz waren. Hie koum an d'Spidol.

Kuerz no Hallefnuecht ass um CR347 tëscht Schieren a Steeën e Won op d'Kopp gaangen. Wéi d'Police mellt, krut de Chauffer an enger Rietskéier d'Leitplanken ze paken. De Won gouf duerno en Hiwwel erofgeschleidert. De Mann gouf net blesséiert, krut awer vun der Police de Permis ewechgeholl, well e gedronk hat.

Um 1.25 Auer krute sech um Belair op der Héicht vum Boulevard Grande-Duchesse Charlotte 2 Autoen ze paken. Et ass kengem eppes geschitt.

Um 2 Auer huet en Automobilist op der Areler A6, op der Héicht vum Briddel, e Camion ze pake kritt an ass weidergefuer. De Chauffer konnt awer an der Sortie Mamer/Capellen gestoppt ginn. Den alkoholtest war positiv an de Permis fort.

Kuerz viru 4 Auer e Samschdeg de Moie fréi ass um CR303 tëscht Nidderkolpech an Uewerpallen ee weideren Auto am Gruef gelant. Hei gouf kee blesséiert.

Ee leschten Accident gouf et géint 4.35 Auer op der A13 an Direktioun Péiteng. Hei krute sech direkt e puer Ween ze paken. 3 Leit goufe verwonnt.