Meteolux hat fir e Samschdeg de Moien deng Alerte jaune erausginn. Wandspëtzten tëscht 75 a 85 Kilometer an der Stonn ware gemellt.

Tëscht 7 an 12 Auer sollt et nawell plazeweis méi stiermesch ginn. Nodeems et schonn e Freideg den Owend a verschiddenen Deeler vum Land méi lëfteg war, war och e Samschdeg de Moien eng Wiederwarnung erausgaangen.

Kachelmann Wetter huet dës Wandspëtzten confirméiert a präziséiert nach, datt vereenzelt och mat kräftege Schaueren ze rechnen ass. Eréischt am Nomëtteg soll sech d'Wieder berouegen, et bleift awer lëfteg mat e puer Oplockerungen dotëscht.

Och a Frankräich hat et e Freideg fatzeg gestiermt. Zäitweis war de Stroum ausgefall, bal 50.000 Stéit ware betraff. Eng Persoun koum bei engem Accident ëm d'Liewen a 5 Persounen goufe blesséiert, well se vun Äscht getraff goufen.

An de leschten Deeg huet et nieft der Loft och kräfteg gereent. Zu Dikrech sinn dowéinst d'Waasserpeegele gutt geklommen.

Aussiichten

Um Sonndeg  bleiwen d'Wolleken um Rendez-vous an et ass zäitweis mat Reen ze rechnen. Et soll weiderhin och lëfteg bleiwen, d'Temperature sollen dobäi awer op 7 bis 10 Grad klammen.

De Méindeg annoncéiert sech moies nach reenereg, nomëttes soll et dréche bleiwe mat Héchstwäerter bis zu 10 Grad.

Méi frëndlech gëtt d'Meteo um Dënschdeg. D'Wolleke wäerten net ganz verschwannen, et soll awer dréche bleiwen mat bis zu 13 Grad.