E besseren a méi konsequenten Accès zu Informatiounen, esou d’Fuerderung vun Presserot un de Premier a Medieminister, Xavier Bettel.

2020 gëtt et kruziaalt Joer fir Äre Secteur, esou de Medien- a Kommunikatiounsminister, Xavier Bettel en Dënschdeg de Moie viru Vertrieder vun de verschidden nationale Medien an der Press. Am Fréijoer soll d'Reform vum Gesetz zur Pressehëllef op de Wee bruecht ginn. Heibäi wier eng ganz nei Approche geholl ginn, déi de professionelle Journalist soll stäerken. De Journalist a seng Aarbecht géif an den Zentrum vun der staatlecher Ënnerstëtzung gesat ginn, an dat onofhängeg dovun, ob fir e Print- oder Onlinemedium, esou de Minister.

Ënner anerem soll awer och de Presserot professionaliséiert ginn, fir nach méi a besser Formatioune kënnen unzebidden, fir d'Journalisten op déi nei Realitéite vum Secteur ze preparéieren.

E weidere Sujet waren d'Diskussiounen ëm de Service Public an d'Gouvernance vum ëffentleche Radio 100,7. Do war et d'Kritik vun der Presidentin vum Presserot Ines Kurschat, datt ee sech eng méi sachlech Diskussioun géif wënschen, déi net hannert zouenen Diere gefouert soll ginn. De Xavier Bettel huet assuréiert, dësen Debat bannent den nächste Méint, an esou breet ewéi méiglech ze féieren.

Extrait Xavier Bettel

„D'Regierung lauschtert no an huet de Message verstanen, dass et en Interêt gëtt, fir engersäits beim 100,7 iwwert d'Gouvernance ze diskutéieren, déi ze verbesseren. Mir hunn do absolut keng Virbehalter an d'Regierung ass och op fir verschidden Optiounen. Mir hunn och e Service Public am Tëleevisiounsberäich, iwwert dee mir wëllen an aller Breet diskutéieren an déi verschidden Aspekter och beliichten. Ech hunn en Debat gefrot an der Chamber, well ech der Meenung sinn, dass et en ëffentlechen Debat soll sinn, wou och déi politesch Volleksvertrieder mat hier Positioun ginn, ier ech definitiv Textproposen och wëll an déi eng oder aner Richtung dann musse proposéieren.“

Vun der Säit vum Presserot war et op en Neits d'Fuerderung, fir méi Transparenz an e besseren Accès zu Informatioune vum Staat. An deem Beräich wier nach villes net esou, wéi et misst sinn. D'Transparenzgesetz wier keen Ersatz fir en offiziellen, am Pressegesetz verankerten Informatiounszougang, esou d'Presidentin vum Presserot Ines Kurschat. De Staat misst d'Journalisten nach besser an hirem Informatiounsoptrag ënnerstëtzen.