Et war nawell eng defteg Kritik, déi d’Chambre des Métiers an d’Fédération des Artisans un d’Regierung op hirem Neijoerschpatt adresséiert hunn.

D’Chambre des Métiers an d’Handwierkerfederatioun hoffen op een decisiivt Joer 2020, wat d’Ëmsetzung vu Mesure fir d’Handwierk ugeet. Dat sot de President vun der Chambre des Métiers, den Tom Oberweis, viru Premier, Chamberpresident an aneren héije Vertrieder aus Politik a Wirtschaft en Dënschdeg am fréien Owend um Neijoerschpatt. Den Tom Oberweis huet dann och kee Blat virun de Mond geholl, wéi et drëms goung d’Regierung ze kritiséieren.

Verschidde Mesure vun der Regierung, wéi de Conge parental Plus oder och nach de weidere Feierdag a Congésdag stoussen dem Handwierk nach ëmmer sauer op. Wien drënner ze leiden hätt, ass aus der Vue vum Handwierk ganz kloer: et sinn d’Betriber. Flexibilitéit schéin a gutt, mä net op Käschte vun de Betriber ass et de Credo.

"Och wann d’Regierung vereenzelt ugedeit huet, datt een d’Uleies vun den Employeure géif verstoen, esou ass näischt Konkretes an deem Sënn passéiert. Politik ass net nëmmen Selbsdarstellung a Marketing sech esou déi meeschten Stemmen bei den nächsten Walen ze sécheren; Politik ass méi; et geet em Nolauschteren, ëm Ofweie vun allen Aspekter, vu Visiounen op laang Siicht iwwert déi nächst Walen eraus, Konsequenze vun Decisiounen mat a Betruecht zéien; alles dat vermësse mir haut!"

Extrait Tom Oberweis

Vun der Regierung géif een ee kloert Signal erhoffen. Den Tom Oberweis gëtt do ee konkret Beispill.

"Een wichtegen Usaz wier, d’Unzuel vun de Congés spéciauxen, déi zur gläicher Zäit am Betrib ufalen, op 10 Prozent vun de Mataarbechter ze limitéieren. Ass dës Quote iwwerschratt, mussen zäitlech gestaffelt Léisungen am Betrib fonnt ginn."
Fir mat der Zäit ze goen a kompetitiv ze sinn, mussen d’Betriber sech moderniséieren an ëmmer méi digital ginn. Dat verlaangt de Kleng- a Mëttelbetriber esou munches of.

"Mä d’Politik ass och gefuerdert. Wéi steet et mam legalen an administrativen Ëmfeld andeems d’Betriber agéieren mussen?

Leider net zum Beschten! Et ass dringend noutwendeg bestoend an zukünfteg gesetzlech Mesuren esou ze gestalten, datt d’Kleng- a Mëttelbetriber kënne fonctionéieren. Weider Belaaschtunge vun den Handwierksbetriber, an den Betriber am Allgemengen, sinn deemno net méi akzeptabel!"

Dem Handwierk feelt u kompetentem Nowuess. Dat hat d’Handwierk schonn am November d’lescht Joer der Politik mat op de Wee ginn, wéi se d'Zuel vun 9.400 Persounen avancéiert hat, déi géife feelen.

"D’Chambre des Métiers huet de Besoin u Mataarbechter an den nächsten 12 Méint op 9.400 Persoune chiffréiert. An den nächsten 10 Joer wäerte sech 3.500 Patronen drop astellen, hire Betrib entweder weider ze ginn oder zou ze maachen. Dat betrëfft aktuell 47.000 Beschäftegt.

E weideren Defi an der Zukunft ass de Klimaschutz. Hei dierften d’Mesuren net zu Laaschte vun de Betriber ëmgesat ginn.