Op der N12 tëscht Aasselbuer an Éimeschbaach ass an der Nuecht op e Méindeg kuerz virun 1 Auer en Zetär-Camion vun der Strooss ofkomm an an e Bam gerannt.

De Chauffer gouf net blesséiert, mä de Schued ass nawell grouss. D’Pompjeeë vu Wëntger waren am Asaz. D’Strooss ass den Ament nach wéinst de Botzaarbechte fir den Trafic gespaart.

Wéi den 112 mellt, koum et géint 21.30 Auer nach zu engem Accident tëscht 2 Ween beim Findel an der Tréierer Strooss. Hei gouf eng Persoun blesséiert.

Kuerz virun 1.30 Auer gouf et am Bësch an der Lëtzebuerger Strooss op der Kockelscheier eng Dampentwécklung. D'Pompjeeë vum Réiserbann waren op der Plaz.

Gebrannt hat et och an enger Kichen, dat kuerz viru 6 Auer e Méindeg de Moien zu Esch op der Place Stalingrad. Knapp 20 Minutte méi spéit stoung zu Esch, déi Kéier an der Rue du Tramway, en Auto a Flamen an um 8.06 Auer gouf um Boulevard Hubert Clement, och zu Esch, eng Persoun ugestouss a verwonnt.

Kuerz no 6 Auer ass nach e Motocyclist zu Capellen gefall a gouf blesséiert. An um 8.55 Auer gouf et nach en Accident op der Diddelenger A3 mat engem Auto, op der Héicht vun der Grenz mat Frankräich. Och hei ass ee Blesséierten ze bekloen.