Wéi de CGDIS mellt, koum et en Dënschdeg den Owend géint 20.45 Auer zu engem Feier am Centre intégré pour personnes âgées zu Rëmeleng.

Éischten Informatiounen no sinn 3 Leit blesséiert ginn. Eng Persoun koum mat Verbrennungen an d'Spidol, zwou weiderer mat liichten Dampvergëftungen.

Wéi den Asazzenter vu Rëmeleng präziséiert, goufe si geruff, nodeems am Altersheem eng Brandmeldung ausgeléist gouf. An engem Zëmmer hat et gebrannt, ma d'Personal hat d'Feier scho geläsht, wéi d'Pompjeeën op der Plaz ukomm sinn.

Nodeems kontrolléiert gouf, dass d'Feier definitiv aus ass, gouf et eng Entwarnung.

Nieft dem Escher Samu waren och d’Secouristen an d’Pompjeeë vu Rëmeleng, Esch, Keel, Schëffleng ,  Diddeleng a Beetebuerg op der Plaz.

Weider mellt de CGDIS ee Kichebrand, dat géint 16.45 Auer an der Rue Bender an der Stad. En Accident tëscht 2 Ween gouf et kuerz virun 18 Auer an der Rue de Medernach an der Fiels. Hei gouf eng Persoun verwonnt.