Den Diplomat war bis elo Ambassadeur zu Moskau. An der Vergaangenheet, stoung de Jean-Claude Knebeler an diverse Fäll an der Kritik.

De Jean-Claude Knebeler soll am Ausseministère zoustänneg fir den Nation Branding ginn, dat mellt Reporter.lu. Wéi Reporter erënnert, stoung de Jean-Claude Knebeler an der Vergaangenheet an der Kritik, ënnert anerem wéinst enger Foto, op där hie mat enger Kalaschnikow poséiert huet. Éier hien an den diplomateschen Déngscht gewiesselt ass, gouf et wuel och Zweiwel bei senger Sécherheetsiwwerpréiwung.

Knebeler back in town: En Tëscheruff vum Nico Graf

AUDIO: Nation Branding / Tëscheruff Nico Graf

Dat nennt ee wuel miserabelen Timing. Annerhallef Woch, ier den dacks vertässelten faméise Frisbee-Prozess mat dräi ugeklote fréiere Membere vum Geheimdéngscht lassgoe soll, gëtt bekannt, datt deen Diplomat, deen deemools och an der SREL-Enquête-Kommissioun hat missen aussoen, elo op Lëtzebuerg zeréckkënnt an un der nationaler Publicitéit schaffe soll. De Jean-Claude Knebeler soll responsabel gi fir d'Kommunikatioun an d'"Diplomatie economique", hätt ee vum Ausseministère confirméiert kritt. De Poste vum Chef vun der Promotion de l'image de marque am Ausseministère ass fräi, zanterdeem d'Francine Closener an d'Chamber nogeréckelt war.

De Jean-Claude Knebeler ass e flamboyante Personnage. Seng Diplomate-Statioune waren New York a Moskau. An dertëschent hat hie mam Geheimdéngscht a mat geheimen Operatiounen ze dinn. Am Wirtschaftsministère vum Jeannot Krecké sollt hien deemools organiséieren, datt Lëtzebuerg eng Protection économique kritt.Dat heescht, datt een als Land net géiff op d'Nues falen, wa sulfurös ultraräich Investisseure sech hei engagéiere wéilten. E gewëssen André Kemmer – ee vun de ugekloten fréiere SREL-Männer – war do säin Agent, fir d'Land géint Industrie-Spionage ze beschützen. Dat ware sou ëm 2011, ee Joer, ier mir d'Aueren-Affär an domat d'SREL-Affär public gemaach hunn, wou och de Jean-Claude Knebeler eng gewësse Roll gespillt.

Virop emol, well hien 2008 gewarnt hat, de Staat sollt sech net an der privater Spionage-Entreprise Sandstone engagéieren. Déi hat jo de fréieren 2. Mann aus dem SREL gegrënnt, de Frank Schneider. De Jean-Claude Knebeler huet gewarnt, de Frank Schneider wéilt nëmme vu senge fréiere SREL-Kontakter profitéieren, fir Suen ze maachen. Do hat hien de gudde Rôle. Manner gutt war seng Roll, wéi erauskoum, datt hie Promotion économique mat Hëllef an Organisatioun vum SREL am Kurdistan gemaach hat. Dat huet dem Jean-Claude Knebeler en Optrëtt an der SREL-Enquête-Kommissioun abruecht. An et gouf eben do déi faméis Foto, wou hien am Kurdistan mam russesche Klabes biicht.

Et ass duerno méi roueg ginn ëm de Jean-Claude Knebeler. Bis hien Ambassadeur zu Moskau sollt ginn an net direkt seng Onbedenklechkeetszensur krut. Dat war wuel eng Zort Sippenhaft, well hie mat enger russescher Fra bestuet war, déi bei engem Oligarch geschafft hat. An elo kënnt hien erëm a soll doheem den Image vu Lëtzebuerg promovéieren, der Welt d'Brandzeeche vum Land opdrécken. Publicitéit - iergendwéi keng Promotioun fir e Strëppenzéier.