Am Laf vum Freideg Moie goufen immens vill Accidenter gemellt, dat ënnert anerem wéinst glate Stroossen.

Esou koum et e Freideg de Moie géint 7.30 Auer an der Grand Rue zu Steebrécken zu engem Accident mat engem Camion. Och hei war et glat.

Um CR162 tëscht Haassel an Alzeng war d'Strooss komplett gespaart, wéinst enger Frontalkollisioun géint 7.45 Auer tëscht engem Auto an engem Bus. Hei gouf den Automobilist verwonnt. Am Bus souz keen. D'Pompjeeë vun Hesper, Weiler an aus der Stad waren am Asaz, grad ewéi d'Ambulanz aus der Stad.

Weider Accidenter gouf et op der Diddelenger A3 a Richtung Gaasperecher Kräiz um Beetebuerger Kräiz, um CR122 tëscht Dräibuer a Fluessweiler koum eng Camionnette vun der Strooss of, op der N15 op der Héicht vu Wolz, um CR106 vu Lampech erfort a Richtung Schuller, op der Escher A4 a Richtung Stad an der Opfaart Leideleng an an der Rue d'Esch zu Monnerech ass ee Won wéinst der glater Strooss an ee stationéierten Auto gerannt. Heibäi gouf eng Persoun liicht blesséiert.

Ee weideren Accident zu Monnerech gouf et an der Rue de Limpach. Hei ass en Automobilist an e Bam gerannt.

Um CR181 zu Stroossen huet sech kuerz viru 6 Auer ee Won iwwerschloen an ass um Daach gelant. De Chauffer gouf liicht blesséiert. D'Pompjeeë vu Koplescht an aus der Stad waren op der Plaz, grad ewéi d'Ambulanz vu Mamer.

Zu Diddeleng ass eng weider Camionnette vun der Strooss ofkomm an ass am Gruef gelant.

Géint 7 Auer ass op der N2 zu Sandweiler ee Won an d'Leitplanke gerannt.

Géint 9 Auer sinn zu Bieles an der rue de l'Electricité 2 Autoen net laanschtenee komm. Och hei gouf eng Persoun liicht blesséiert. D'Ambulanz an d'Pompjeeë vu Suessem/Déifferdeng waren op der Plaz.

Um 4.30 Auer koum et an der Dicksstrooss zu Briedemes zu nach engem Accident, hei waren awer net déi glat Stroosse Schold, ma de Chauffer hat ze vill gedronk.

D'Police erënnert an dësem Kontext nach eemol drun, wéi wichteg Wanterpneue bei dëse Wiederkonditioune sinn.