D'Legaliséierung vu Cannabis hëlt Konturen un. E provisorescht Konzept vum Gesondheetsministère géif stoen, gouf awer nach net am Regierungsrot ugeholl.

Dat provisorescht Konzept vum Gesondheetsministère läit dem Radio 100komma7 vir. Wéi et heescht, kéint den Handel "informatesch" kontrolléiert ginn. Et géing net drëms goen, de Gebrauch vu Cannabis ze normaliséieren oder banaliséieren, mä fir en z’encadréieren, sou d'Konzept.

Cannabis zu Lëtzebuerg - Reportage Tim Morizet

Eng ganz Lëscht vu Reegele si schonn am Dokument festgehalen, beispillsweis soll eng Persoun pro Mount dierfen 30 Gramm kafen, à Condition, datt e méi wéi 18 Joer al ass an zanter 6 Méint hei am Land ugemellt ass. De Konsum wier op ëffentleche Plaze weiderhi verbueden an déi eege Produktioun och.

Donieft wieren 14 Verkafspunkten fir d'ganzt Land virgesinn, dorënner 4 an der Haaptstad.

E maximalen THC-Taux fir d'Cannabis-Produiten wier net virgesinn. Onkloer wier nach, wéi d’Cannabis-Legaliséierung an Aklang mam internationale Recht kéint bruecht ginn.

Interview mam Paulette Lenert

D'Legaliséierung vum rekreative Cannabis, also deen ouni Rezept vum Dokter zu Lëtzebuerg, hëlt méi konkret Formen un. E provisorescht Konzept vum Gesondheetsministère gouf wéi gesot e Méindeg de mueren um Radio 100komma7 geleakt. Dëst wier allerdéngs just e Konzept wou sech nach e puer Saachen ännere kéinten, heescht et vum Ministère.

Cannabis zu Lëtzebuerg - Reportage Tim Morizet

Et ass en Dokument vun engem Konzept, dat bis elo nach net vun der Regierung ënnerstëtzt oder akzeptéiert ginn ass.

Et wier och nach net weider interministeriell um Projet Cannabis geschafft ginn, esou d'Gesondheetsministesch Paulette Lenert: „Well mer am Februar zum Schluss komm sinn, datt mer nach eng Rei Froen nach musse verdéiwen. Den Dossier Cannabis ass e villschichtegen Dossier a wann dat Dokument elo kënnt, hutt der och e kléngen Androck vun der Villschichtegkeet. Do stelle sech ganz vill Froe ronderëm d'Reglementatioun. Et geet iwwert den internationale Kontext, iwwert den Impakt op der Finanzplaz, ma och den Detail iwwert d'Produktioun, de Lizenzen, an esou weider.“

Et misst ee sech an enger nächster Phase juristesch ofsécheren, fir net géint internationaalt Recht ze verstoussen. Lëtzebuerg huet nämlech verschidden UNO-Konventiounen ënnerschriwwen, déi den Ëmgang mat psychotrope Substanzen an Drogen op internationalem Plang reegelen.

Et géif awer effektiv nëmmen dat ee Konzept ginn. Wou och eng Rëtsch vun de Mesuren sech nach dëst Joer bestätegen dierften. Am Summer soll et nämlech Kloerheet ginn, vläicht och e Projet de loi.

Dat och well se staark dem kanadesche System oder deem aus dem Colorado aus den USA entspriechen. Dat géif esou vill heeschen, ewéi datt eng Persoun pro Mount dierft 30 Gramm kafen, à Condition, datt ee méi wéi 18 Joer al ass an zanter 6 Méint hei am Land ugemellt ass. De Konsum wier op ëffentleche Plaze weiderhi verbueden, genau ewéi d'eege Produktioun och. De Cannabis, deen dann zu Lëtzebuerg consomméiert gëtt, kéint mat grousser Warscheinlechkeet dann och zu Lëtzebuerg produzéiert ginn.

Bis datt et awer zu Lëtzebuerg esou wäit ass, wéilt een awer d'Entwécklung an Holland ofwaarden: „Eis eben och déi Zäit huelen déi et brauch. Dat heiten ass kee Kontext, deen hei an Europa scho 5 mol getrëppelt gouf. D'Hollänner wäerten déi éischt sinn, déi an dës Richtung ginn, och warscheinlech ganz kuerzfristeg. Mais do wësse mer och nach kee genauen Datum.“

Lëtzebuerg wier also net dat éischt Land an Europa wat de Cannabis géif legaliséieren. Et géif awer weider um Dossier geschafft ginn, heescht et aus dem Ministère.

Besuch op der gréisster Cannabis-Plantage vun Europa

E Méindeg huet de Radio 100,7 gemellt, datt dat provisorescht Konzept fir d’Reglementatioun vum Cannabis géif stoen. D’Dokument géif der Redaktioun virleien, dëst wier eng Basis fir ee reglementaire Kader auszeschaffen. Bis de Summer sollen awer nach Concertatiounen mat de Nopeschlänner, souwéi tëscht den Ministeren an EU-Institutiounen ginn, ma nawell ginn et schonn eng ganz Rei Propositiounen, wat de Konsum, de privaten Ubau oder sougenannt Verkafspunkt betrëfft.

© RTL

Zënter iwwert engem Joer ass jo elo schonn den CBD, de Cannabis ouni THC legal. Mir hunn eis ugekuckt, wei dëse Business hei am Land bis ewell funktionéiert a gereegelt ass a waren op déi gréissten Cannabis-Plantage an Europa.