Den Yves Cruchten war e Méindeg Invité um Plateau vum RTL-Journal.

D'Francine Closener hat déi lescht Woch annoncéiert, datt si aus familiäre Grënn net géing fir d'LSAP-Presidence kandidéieren. Den Deputéiertekolleeg Yves Cruchten soll elo asprangen an nächsten LSAP-President ginn.
Eigentlech wollt de fréiere Generalsekretär Cruchten mat Parteimandater e bësse Paus maachen, sot eis de Käerjenger Sozialist.

Et géif ganz vill Talenter a senger Partei ginn, ma d’Presidence wär eppes, wat een net sou einfach aus dem Aarm rësele géif, sou de fréiere Generalsekretär. Hie wär an der glécklecher Situatioun, keng duebel Funktioun ze hunn, soudass d’LSAP-Presidence vläicht besser a säin Agenda passe géif wéi an aneren hiren; hien hätt och de Virdeel, d’Partei gutt ze kennen.

D'Evenementer kéimen net ëmmer, wéi ee se géing plangen an hie wier elo prett, fir sech där Erausfuerderung ze stellen. Seng Devise fir d'Zukunft ass: manner Idealismus, méi Pragmatismus.

Extrait Yves Cruchten

Et geet mer net drëm, fir alles neizemaachen. Mir sinn an engem Reformprozess an dee wëll ech fäerdeg maachen. Et soll een awer net ze vill Chantiere lasskappen, et soll ee sech op dat Wesentlecht konzentréieren. Ech wënsche mer vläicht manner Idealismus a méi Pragmatismus. D'Leit solle konkret Äntwerten op d'Suerge vum Alldag kréien.

Am Koalitiounsaccord stéingen och vill gutt Saachen zum Logement; donieft misst ee sech vläicht d’Fro stellen no der iwwerméisseger Protectioun vu Propriétéit am Land. Enorm vill Terraine wären a ganz wéinegen Hänn, wat net gutt wär; do misst een intervenéieren, Stéchwuert Grondsteier, huet den eventuell nächste President vun der LSAP gemengt.

Datt den Yves Cruchten soll Parteipresident ginn, dat wier iwwregens eng gemeinsam Decisioun. De Vize-President Dan Biancalana, de Generalsekretär Tom Jungen, de Vize-Premier Dan Kersch an de Fraktiounspresident Georges Engel wieren zesumme mam Yves Cruchten zur Conclusioun komm, datt hien dat sollt maachen.

D'Decisioun fält um Kongress den 8. Mäerz.