En Donneschdeg de Moie gouf um Stater Geriicht d'Urteel gesprach wéinst engem déidlechen Aarbechtsaccident am Abrëll 2016 an der Stad.

„An Affäre vun engem déidlechen Aarbechtsaccident, bei deem ee gestuerwen ass, kann ee kengem et richteg maachen!". Dat sot en Donneschdeg de Moien um Stater Geriicht den Affekot vum Gerant vun enger Baufirma. Dee war do virdrun, am Zesummenhank mat engem déidlechen Aarbechtsaccident am Abrëll 2016 an der Stad zu 3 Méint Prisong mat Sursis an zu enger Geldstrof vu 5.000 € verurteelt ginn.

Géint d'Firma selwer gouf eng Geldstrof vun 20.000 € gesprach, fir e Viraarbechter koum et zum Fräisproch a fir d'Parties civiles net zu Schuedenersatz.

AUDIO: Déidlechen Aarbechtsaccident / Rep. Eric Ewald (27.2.2020)

En Aarbechter vun 39 Joer war deemools erdréckt ginn, nodeems eng Stëtzmauer ofgebaut an den Onglécklechen duerch de Buedem, deen dës Mauer zréckgehalen hat, verschott gouf.

De Me Philippe Penning, Affekot vum verurteelte Gerant, huet vun enger extrem schwéierer Affär geschwat. Dass d'Prisongs- an d'Geldstrof fir de Gerant ënnert deem leien, wat vum Vertrieder vum Parquet gefuerdert gouf, ass dem Me Philippe Penning no wuel richteg.

Fir den Affekot vum Gerant vun der Baufirma war dëst eng interessant Affär, well et ëm d'strofrechtlech Responsabilitéit vun enger Personne morale goung.

Soudass een domat liewe kéint, wéi de Me Philippe Penning betount huet.