Dat seet d'Anne-Maire Hanff, d'Presidentin vun der ANIL, der Associatioun vun den Infirmièren.

Si sinn der Gefor aktuell all Dag hautno ausgesat: d'Infirmièren an d'Infirmieren, iwwerhaapt: d'Fleegepersonal.

Hir Situatioun hätt sech par Rapport zum Ufank vun der sanitärer Kris liicht verbessert, seet d'Anne-Maire Hanff, d'Presidentin vun der ANIL, der Associatioun vun den Infirmièren. Et géif ee spieren, dass de Gesondheetsministère dat Bescht géif maachen, fir genuch Material, zum Beispill d'Otemschutzmasken, erbäizekréien. Mä et géif nach ëmmer Material feelen, an dat wär net alles, Anne-Marie Hanff.

Anne-Marie Hanff - 1. Ausso

''Wat elo nach feelt si ''Guidelines'', déi konkret d'Fleeg vu Patiente mam Virus betreffen. Oder awer och déi konkret Probleemer vun den Infirmieren an der Praxis, ewéi zum Beispill d'Fro, wéi ech mech awer protegéieren kann, wann ze wéineg Material do ass.''

Et hätten och schonn Infirmiere sech bei der ANIL gemellt, déi positiv op de Virus getest gi sinn. D'Anne-Maire Hanff bedauert, dass et keng kloer Richtlinne fir d'Infirmiere géif ginn, wéini d'Fleegepersonal misst getest ginn, a wéi d'Fleeg vun de Patienten an dësen Zäiten ausgesi muss. Wéi ee sech zum Beispill protegéiert, wann ze wéineg Material do ass. Vill Membere géife sech den Ament un d'ANIL riichten, well se Angscht hätten, erkläert d'Presidentin. Angscht, sech an duerno vläicht hir Famill an Patienten z'infizéieren.

Anne-Marie Hanff - 2. Ausso

''Mir si gewinnt, dass mir musse lafen, dass mir eng ganz Schicht laang net op Toilette kënne goen oder näischt kënnen drénken. Dat verdréit ee besser ewéi d'Angscht ze hunn, dass een eppes falsch gemaach oder een aneren ugestach huet. D'Leit, déi eis elo honoréieren an och owes op de Balcone klappen.. dat réiert een immens. Besser wär, wann herno, no der Kris, d'Gesellschaft eis da wierklech géif ënnerstëtzen, dass eis Aarbechtskonditioune besser ginn an och eis Formatioun.''

D'Anne-Marie Hanff fënnt et och onglécklech, dass kee Vertrieder vum Fleegepersonal an der Cellule de Crise ënnert der Leedung vum Gesondheetsministère dobäi ass. Zejoert schonn hat d'Associatioun vun den Infirmieren e sougenannten ''Directeur des soins'' an der Santé gefuerdert.