D'Sportsproffe bedaueren, datt kee Sport bis Enn vum Schouljoer ass, dat huet d'APEP an engem Schreiwes däitlech gemaach.

Kee Sport an der Schoul / Reportage Jeff Kettenmeyer

D'Lëtzebuerger Associatioun vun de Sportsproffen huet an engem Schreiwes kloer gemaach, datt een net begeeschtert ass iwwert d'Decisioun, datt bis Enn vum Schouljoer kee Sport méi ass.

Et huet ee wuel Versteesdemech, datt et aktuell komplizéiert wier an et eng speziell Situatioun ass, allerdéngs hätt ee mëttelfristeg duerchaus Alternative fonnt.

Et hätt ee kloer Reegele missten opstellen a festhalen, ënnert wéi enger Hygiène vereenzelt Sportaarte wéi Dëschtennis, Badminton oder am Ausdauerberäich hätte kënne bäibehale ginn, sot de President vun der APEP Claude Schumacher am RTL-Interview.

Et dierf een net vergiessen, datt déi aktuell Beweegungsaschränkung ee groussen Impakt op d'Schüler kann hunn.

"No 10 Deeg huet ee schonn déi éischt Auswierkungen, Muskelen an de Kreeslaf leiden drënner a gi méi schwaach, Gehier gëtt da manner duerchblutt. Dat sinn natierlech alles Auswierkungen, déi sech net nëmmen op déi kierperlech Fäegkeeten bezéien, mä natierlech och ganz staark op déi psychesch an kognitiv Fäegkeete wierken."

Et gouf och keen Dialog tëscht deene politesch Responsabelen an de Sportsproffen iwwert dës Decisioun.

"Nee, mir sinn do weder gefrot nach vun eisem Ministère am Virfeld informéiert ginn. Dat ass sécherlech doduerch bedéngt, datt de Schoulsport aktuell hire mannste Problem ass, an awer ass et schued, datt dat Ganzt quasi an engem Niewesaz an onkommentéiert annoncéiert gouf. Et hätt een do duerchaus kënnen drop hiweisen, datt d'Beweegung wichteg ass an ee groussen Impakt huet op d'Wuelbefanne vun de Kanner a Jugendlechen."

Fir de President vun der APEP Claude Schumacher wieren et mëttelfristeg duerchaus Alternativen an Méiglechkeete fir de Schoulsport ginn.

Extrait Claude Schumacher

"Ech mengen do hätt ee sech villes kënne virstellen, wéi een dat hätt kënne realiséieren. Et hätt ee sécherlech kee 'Ringen und Raufen' gemaach, mä sou Saache wéi Dëschtennis, Badminton oder och am Beräich vun der Ausdauer an der Koordinatioun hätt ee sech Villes kënne virstellen.

Natierlech ass dat alles och kaum virstellbar, soulaang mir eng absolut Maskeflicht hunn, woubäi ech do awer staark hoffen, datt mir dat net bis de 15. Juli oprecht erhalen, well et awer fir all bedeelegt Persounen, Schüler wéi Enseignant, eng ganz sauer Geschicht ass."

No der Decisioun, datt kee Sport bis Enn vum Schouljoer ass, läit d'Responsabilitéit domat aktuell an och an den nächste Wochen forcement bei den Elteren, sou de Claude Schumacher.

"Mir encouragéieren an enger éischter Linn emol d'Schüler selwer, datt si sech solle fit halen, mä natierlech ass dat vill méi einfach, wann d'Eltere mat engagéiert an involvéiert sinn."