Nodeems den 13. Mäerz de leschte reguläre Schouldag hei zu Lëtzebuerg war, ginn d’Schoulen elo lues a lues erëm op.

De leschte Méindeg hunn Premièresschüler rëm d’Schoulbänke gedréckt an dëse Méindeg ass et un dem Rescht vun de Klasse vum Secondaire am Secondaire technique.

An all Lycée ginn d’Klassen an zwou Gruppen opgedeelt: De Grupp A an de Grupp B. D’Schüler aus dem Grupp A ginn dëse Méindeg an d’Schoul an de Grupp B ass déi Woch vum 18. Mee drun. Am Virfeld vun dëser ongewinnter Rentrée sinn d’Schüler informéiert ginn, wéi et ofleeft, wa si e Méindeg kommen, esou Directrice adjointe vum Fieldgen, Sylvie Wagner. Eng hëlze Beschëlderung weist de Schüler de Wee bei déi richteg Entrée. Do stinn dëse Méindeg de Moien d’Educateuren an och nach anert Personal, déi de Schüler sollen hëllefen, fir de séierste Wee an hire Klassesall ze fannen.

Fir d’Virschrëfte vum Ministère z'erfëllen, hunn eng Rei Changementer missen ëmgesat ginn. Et ginn elo duebel esou vill Dieren, wou d’Schüler an d’Gebai erakommen, also am ganze sechs. Fir erauszekommen, sinn et der néng. D’Schüler sinn net méi onbedéngt an hirem gewinnte Klassesall an de Wee dohinner ass eventuell méi laang an en ass mat Verkéiersschëlter an Oftrennunge markéiert. An de Gäng sollen d’Schüler just an enger Richtung zirkuléieren. Et ginn Trapen fir erop an anerer fir erof.

An de Klassesäll gesäit et och aneschters aus wéi gewinnt. Fir déi zwee Meter Distanz tëscht de Schüler ze garantéieren, kënnen an de grousse Säll véierzéng Schüler eran an an den anere Säll däerfen dacks net méi wéi siwe Schüler dobanne sinn. Dowéinst hu misse vill Bänken a vill Still erausgeholl ginn. An de Säll, wou d’Pult vum Proff richt virun der éischter Bänk ass, ass och nach Plexiglas installéiert ginn. Do dernieft ass an all Sall Desinfektiounsgel, Seef a Pabeier fir d’Hänn installéiert ginn. Et hu missen nei Dreckskëschte bestallt ginn, déi een ouni Kontakt kann opmaachen.

D‘Infirmièrë vun der Schoul verdeelen den éischte Moie no 8.00 Auer an de Klassen all Schüler eng Enveloppe mat fënnef Masken an zwee Buffen.

D’Stonnepläng sinn och geännert ginn: no all Schoulstonn, déi véierzeg Minutten dauert, ass eng Paus vun zéng Minutten. Ee Mol däerfen d’Schüler an den Haff an awer do däerfe se sech nëmmen an enger bestëmmter Zon ophalen. D’Klasse ginn op d’Pause verdeelt. E Schouldag dauert bis 12.50 Auer.

D’Schüler hunn d’Méiglechkeet eng Frupstut ze bestellen, wou e Sandwich, eng Mëtsch, en Uebst an e Jughurt dran ass. Si kënne sech och eppes vun doheem matbréngen, mä dat muss an enger Pabeiers-oder Plastikstut sinn, déi nach an der Klass ewechgeheit gëtt. D’Haaptmoolzecht sollen d’Schüler am Beschten doheem iessen.

Am Internat vum Fieldgen ginn et och eng Rei nei Bestëmmungen, wéi d'Carole Jacoby, Chargée de Direction vum Internat, erkläert. Déi Intern sinn an Hausgruppe vun zéng agedeelt. Des Gruppe solle sech dann och den Dag iwwer net kräizen. An all Zëmmer schléift just eng Schülerin. Wann déi zwee Meter Distanz net kënnen agehale ginn, dann ass och am Internat eng Mask obligatoresch. An der Kantin gëtt d’Iesse fir si gekacht a fir jiddereen op Plateaue preparéiert, déi si dann op hir Plaz bruecht kréien. Esou gëtt evitéiert, datt déi Intern onnéideg hin an hier rennen an datt onnéideg eppes ugepaakt gëtt. D’Fräizäitaktivitéiten hunn och missen adaptéiert ginn: et gëtt kee Sport gemaach an d’Fitnessgeräter sinn net accessibel.

Fir d’Exame vun de Primaner lafen d’Preparatiounen och elo schonn op Héichtouren, esou Directrice adjointe vum Fieldgen Sylvie Wagner. Fir datt och do déi zwee Meter Distanz tëscht de Schüler kann assuréiert ginn, sinn déi eenzel Schoulbänken an den zwou Sportshalen opgeriicht ginn. Déi vulnerabel Schüler vun den Ofschlossklasse ginn entweder nach méi wäit ewech gesat oder ganz getrennt an en anere Sall gesat. Déi Sportshale sinn an engem separate Gebai an esou hunn d’Primaner dann och kee Kontakt mat den anere Schüler. D’Proffen dinn och eng Mask un, wa se duerch de Sall ginn. Och do steet Gel, fir d’Hänn ze desinfizéieren.

Mat all dëse Mesurë kann d’Gesondheet vun de Schüler an den Enseignante beschtméiglech geschützt ginn.

Rentrée zu Clierf

Och am Lycée Edward Steichen, dee virun 2 Joer eréischt seng Dieren zu Clierf opgemaach huet, sinn d'Schüler zeréck an de Schoulbänken. Et géing ee sech freeën, dass d'Schüler nees do sinn. Et wier ee gutt preparéiert, sou de Jean Billa, Direkter vum Lycée.

De Jean Billa am Interview

Re-Rentrée am Clierfer Lycée: Enseignement vun digitale Medien ass e grousse Virdeel

Reouverture vun de Schoulen - Reportage Annick Goerens

Leschte Méindeg war et un den Ofschlossklassen, dëse Méindeg war et dann och un allen anere Lycéesklassen, fir nees d’Schoulbänk ze drécken. Wei gouf de Lockdown iwwerbréckt an ass een nees frou, endlech an d’Schoul ze goen? D’Annick Goerens war e Méindeg de Moie fir eis de Bols fillen, dat am nërdlechste Lycée vum Land.

Zanter genee 2 Méint ware keng Schüler méi am fuschneie Lycée Edward Steichen zu Klierf, deen eréischt virun 2 Joer seng Dieren opgemaach huet. Ofschlossklasse ginn et zu Klierf nach keng, dofir awer international Klassen an de Clierfer Lycée ass besonnesch staark am Enseignement vun digitale Medien. Eppes wat hinnen elo och an d’Hänn gespillt huet, wei eis de Sébastien Verbert erkläert, deen ënner anerem responsabel ass fir d’Elteren, d’Schüler, d’Proffen an d’Direktioun an der digitaler Kultur ze begleeden.

„Le plus grand challenge était de s’assurer que la continuité pédagogique était possible. On a été formé tous à travailler avec des élèves en direct, mais maintenant quand ces élèves sont en direct, mais pas forcément face à nous, les stratégies éducatives changent. Et donc il a fallu les accompagner pour trouver une évolution dans nos pratiques. Ce n’est pas un changement de pratique, mais une évolution de nos pratiques.»

All Schüler am Clierfer Lycée huet säin eegenen iPad an ass gewinnt, domadder ze schaffen. Dat war am Confinement e Virdeel, erkläert d’Enseignante Christiane Schaack.

„Dat heescht, si si scho gewinnt eis Saachen ze schécken. Si si gewinnt, dass si zum Deel Retour vun eis esou kréien. Natierlech huet awer den direkten Austausch gefeelt. Wann ee soss kann direkt reagéieren, hei ass awer och wann mir schnell reagéieren, also Moies ëmmer disponibel fir si waren, t’ass een awer net op d’Sekonn do. Dat heescht dat ass awer een anert Schafen, och wann een den direkte Retour vun de Schüler huet.“

Wat steet dann elo eigentlech um Programm? Den Däitschproff Jeff Bourgraff: „Also elo den éischten Dag steet um Plang, dass se virun allem mol déi nei Reegelen erkläert kréien. An da schaffe mer mol déi Saachen, wou ech Réckmeldung krut, dass si se nik sou gutt verstanen hunn, déi schaffe mer dann nach eng Kéier op. Mir hunn jo dann och nach e ganze Mount Zäit, bis si Prüfungen hunn, sou dass si do och net musse fäerten, dass et elo ze vill Drock gëtt an dat elo vun hinne verlaangt gëtt, dass se déi Saachen, déi se eleng doheem opgeschafft hunn, dass se déi ganz eleng mussen ëmsetzen.“

Béid Proffen hunn sech op alle Fall gefreet fir endlech nees richteg Schoul ze halen.  An wei fillen sech d’Schüler? Hei eng Partie Aussoen: "Jo komesch, well et gesäit alles anescht aus." "Ech hunn mech gefreet, well et doheem sou lues langweileg ginn ass. An ech wollt erëm iergendwou anescht hikommen, wei ëmmer doheem ze setzen." "T’ass ongewinnt dass jiddereen elo Masken huet." "T’ass bal erëm wéi den 1. Schouldag, well mer jo elo sou laang fräi haten." "Hmm... et geet. Also ech freeë mech net esou erëm an d’Schoul ze kommen, mee dat muss sinn."

D’Haapt-Erausfuerderung géing elo dra bestoen, fir d’Schüler vun de verschiddene Klassen, déi sech gutt ënnertenee kennen, well se vill gemeinsam Aktivitéiten hunn, och an Zukunft vunenee fort ze halen. Schued, mä leider déi nei Realitéit, sou nach den Direkter vum Clierfer Lycée Jean Billa.

Meedercherslycée Hubert Clement zu Esch

Eng Woch no de Premièresklasse koumen e Méindeg d'Schüler vun all deenen anere Joergäng zeréck an d'Schoul.

Aus Sécherheetsgrënn goufen d'Klassen opgedeelt. Eng Hallschent vum Schülereffektiv kënnt dës Woch an d'Coursen. Dat sinn am Fall vum Lycée Hubert Clement 400 Jonker vu 7ième bis 2ième. Fir si huet e Méindeg no bal 2 Méint nees eng aner Glack gelaut. Déi aner Hallschent kënnt d'nächst Woch zréck.