Wat déi laang Delaien ugeet, bis d’Leit Äntwerten op hir Demandë kruten, dat hätt dorunner geleeën, datt een deels iwwerschwemmt gi wär, sou de Minister.

Refus vun den Aiden - Reportage Maxime Gillen

Dofir hat de Mëttelstandsministère initial no an no eng Rei Nouthëllefen ugekënnegt. Déi 1. Hëllef war eng Indemnitéit vu 5000€ fir Betriber, mat bis zu 9 Mataarbechter, déi vum 16. Mäerz un hu missen zoumaachen. Elo héiert een awer ëmmer méi rose Patronen, déi dës Aide refuséiert kruten. Firwat eigentlech?
Knapp 6.000 Entreprisen krute bis ewell 5.000 Euro un Direkthëllef vum Staat ausbezuelt. Gutt 1.200 Independante kruten eng Hëllef vun 2.500 Euro accordéiert. Dat sinn alles an allem scho gutt 32 Milliounen Euro, déi bannent de leschte sechs Wochen gefloss sinn. Derbäi kommen nach eng Kéier méi wéi 30 Milliounen Euro un Direkthëllefen fir kleng Entreprisen an Independanten, där hiren Ëmsaz wéinst der Kris ëm méi wéi 50 Prozent agebrach ass. Gläichzäiteg huet de Ministère awer och eng ganz Partie Demandë refuséiert. Refusen, déi op wéineg Versteesdemech bei deene Concernéierten treffen.

De Joaquim Pereira verkeeft Kaffi, Téi a Botzproduiten u Restauranten a Caféen. 6 Wochen, nodeem hie seng Demande agereecht hat, koum de Refus, mat der Erklärung, datt hie säi Betrib net hätt missen zoumaachen.

De Joaquim Pereira huet säi Betrib virun 2 Joer gegrënnt: "Je comprends pas le refus, parce que je ne peux pas travailler, tout le secteur Horesca est fermé, je ne peux pas recevoir de clients chez moi. [...] Le but de l'entreprise c'est la vente de matériel pour les professionels Horesca. Alors ils ont fermé aussi, j'étais obligé d'arrêter de suite mon métier."

Op senger Covid-19-Hotline ass d’House of Entrepreneurship ëmmer méi mat Patrone befaasst, déi Refuse vum Mëttelstandsministère kruten. Dacks wären d’Formulairen net richteg ausgefëllt ginn. Oder awer d’Hëllef net richteg verstanen.

Ronn 35 Prozent vun den Demandë fir eng Hëllef vum Staat wiere refuséiert ginn, erkläert den Tom Baumert, Direkter vum House of Entrepreneurship. Dat an der Haaptsaach, well d'Formulairen net richteg ausgefëllt waren oder well d'Demandeure guer net eligibel fir dës Hëllef waren.

Den Tom Baumert, den Direkter vum House of Entrepreneurship: "Ganz vill Leit hu gemengt, si wieren eligibel, sinn et awer net. Dat läit dorunner, dass Geschäfter hu missen zoumaachen. Aner Betriber eben net. Ganz vill Leit hunn awer do eng Hëllef ugefrot, déi do awer net drënner gefall sinn."

Et géif ee keen am Ree stoe loossen, esou dat grousst Versprieche vun der Regierung um Ufank vun dëser Kris. An Tëscht hunn Dausenden Entreprisen an Independanten Hëllefe beim Staat ugefrot an dës och kritt. Fir Entreprisë mat manner ewéi 10 Mataarbechter ginn et an Tëscht 4 verschidden Hëllefen, déi si kënnen ufroen. Domat wier deene meeschte scho gutt gehollef, mengt den Direkter vum House of Entrepreneurship, Tom Baumert. Bei méi grousse Betriber mat méi wéi 10 Employéeën, wier dat schonn net méi esou kloer:

Den Tom Baumert iwwert d'Betriber

„Fir déi 10 bis 20 bezweiwelen ech am Moment, dass deen Hëllefspak grouss genuch ass. Wann een doriwwer eraus geet, iwwer 20, déi hunn de Moment guer keng Direkthëllefe bis op de Chômage partiel. An do gesäit een ëmmer méi, virun allem bei deene Secteuren, déi am stäerkste betraff sinn, dass et ganz ganz enk gëtt, dass et ganz vill Liquiditéitsproblemer wäert ginn. Déi kënnen sech och net iwwerschëlden. Do mécht et vläicht och heiansdo méi Sënn eng Faillite ze maachen, wéi weider Scholden opzebauen.“

Sollten et keng weider Direkthëllefen, déi net mussen zeréckbezuelt ginn, och fir déi méi grouss Entreprise ginn, géifen dem Tom Baumert no eng ganz Partie Betriber geschwënn a gréisser Schwieregkeete geroden.

De Mëttelstandsminister Lex Delles: "Ech verstinn, dass deen, deen net huet missen zoumaachen, dass deen och gär Aide wëll. Dofir hu mer jo eng zweet Aide gemaach vu 5.000 Euro an Aidë fir Independanten."

Esou ass de Joaquim Pereira fir 3 weider Indemnitéiten eligibel, a kéint am ganze bis zu 11.500€ Hëllefe kréien. Ma de Mann fäert, datt en nees e Refus kritt, a virun allem leeft Zäit him fort.

Och beim Joëlle Roettgers huet et ee Mount gedauert bis d’Äntwert vum Ministère an der Boîte louch. Si huet hir Danzschoul vum 16. Mäerz u missen zoumaachen, krut déi éischt 5000-€-Hëllef awer refuséiert, well si keng Handelsermächtegung huet. D'Joëlle Roettgers huet zanter 1989 eng Danzschoul: "Mir bezuelen TVA, Steieren, grad wéi déi aner Betriber och. Et war ni erfuerdert, datt mer eng Autorisation de Commerce sollten hunn, wéi mer déi Zäit opgemaach hunn a lo kréie mer eben dee Refus."

Et géif méi Leit an der Situatioun wéi d’Joëlle Roettgers, dat huet een an der Lescht am House of Entrepreneurship gemierkt. De Mëttelstandsministère wëll awer hei keen Aen zoudrécken, et wier eng Hëllef, déi sech cibléiert u Leit mat Handelsermächtegung géif riichten. Déi aner kéinten Hëllefe fir Independanten ufroen. De Lex Delles: "Wann een d’Autorisation d’établissement net freet, mécht een natierlech op fir ganz vill Sparte vu Beruffer, déi net reglementéiert sinn. Sou ass ee Volet zum Beispill d’Affekoten oder anerer, déi och keng Autorisation d’établissement hunn an déi also net iwwert de Mëttelstandsministère hei organiséiert sinn."

D’Joëlle Roettgers fält deemno an d’Kategorie vun den Independanten an ass domadder fir maximal 6.500€ Hëllefen eligibel. Dës mussen elo emol ugefrot ginn. Den Ament geet se un hiert Erspuertes, dat se fir d’Pensioun op d’Säit geluecht hat, well se de Betrib erhale wëll.

De Joaquim weess net, ob hien dat packt: "Je ne sais pas... je ne sais pas... si ça continue comme ça, je pense même arrêter."

Wat déi laang Delaien ugeet, bis d’Leit Äntwerten op hir Demandë kruten, dat hätt dorunner geleeën, datt een iwwerschwemmt gi wär vun Ufroen, esou de Mëttelstandsminister. Mëttlerweil hätt ee sech awer informatesch organiséiert, esou datt d’Dossiere méi séier traitéiert géifen. Léich den Accord bis an der Boîte, géif et normalerweis héchstens 5 Deeg dauere bis d’Suen um Kont wieren.