D'Regierung huet scho vill fir d'Betriber gemaach, notamment, fir mat Liquiditéitsproblemer ze hëllefen, ma elo musse méi cibléiert Hëllefe kommen.

Dat sot den Direkter vun der Chambre de Commerce Carlo Thelen am Interview op RTL Télé en Dënschdeg den Owend. Dat heescht fir Betriber, déi den Ament net dierfe schaffen, wéi an der Hotellerie, dem Tourismus oder der Restauratioun. Awer och fir déi Entreprisen, déi elo schonn duerften opmaachen, awer wéinst der Kris an de Sécherheetsmesuren op Perte schaffen.

"Den Horeca-Secteur, wou een d'ailleurs drop waart, datt endlech en Datum kënnt, wéini déi nees kënnen opgoen, mä do brauche mer Hëllefen, déi sech méi an der Durée aschreiwen, vläicht bis zum Enn vum Joer, déi och Coûts fixes géinge couvréieren, och eventuell d'Cotisations patronales, dat heescht, dat musse scho méi grouss Mesurë sinn, déi och Betriber betreffen, déi iwwer 20 Salariéeën hunn, well bis elo war dat jo oft eng Limitt, an deen do driwwer war, dee konnt näischt kréien."

D'Handelskummer fuerdert, dass de Chômage partiel a verschiddene Fäll soll kënne weiderlafen. Et missten awer och nach weider Mesurë kommen, déi bis zum Enn vum Joer gräifen, an d'Coûts fixes vun de Betriber viséieren. An dat och fir méi grouss Betriber, esou de Carlo Thelen.

Fir déi Entreprisen, déi am schlëmmste betraff wieren, missten och cibléiert weider Hëllefe kommen, déi net misste rembourséiert ginn. Dee gréisste Problem fir iwwert d'Hallschent vun de Betriber wier nämlech d'Liquiditéit. D'Betriber wéilte sech ouni Previsibilitéit nämlech och net onbedéngt verschëlden. D'Banke wieren en Deel vun der Léisung a kéinten hëllefen, ma et misst een och oppassen, dass si méi spéit mat eragezu ginn, well d'Betriber hir Prêten net méi zréckbezuele kéinten.

De Carlo Thelen huet begréisst, datt d'Regierung d'Investissementer géif héichhalen. Et misst awer och gekuckt ginn, wou soll investéiert ginn: der Handelskummer no ënnert anerem an der Digitalisatioun, dem Transport awer och der Re-Industrialiséierung. Et missten hei och Mesurë geholl ginn, fir Industrie-Betriber unzelackelen.

Den Direkter vun der Chambre de Commerce ass géint Steiererhéijungen - dat wier Gëft fir d'Wirtschaft an d'Attraktivitéit vu Lëtzebuerg. Wuel misst d'Regierung elo vill Suen an de Grapp huelen, ma d'Staatsfinanze wiere gutt a bei engem Deel vun den annoncéierte Mesurë misst jo net direkt Cash ausbezuelt ginn, wéi bei de Garantien.

Och fir de Giovanni Patri mussen d'sozial Kotisatiounen erofgesat ginn. Hien ass President vun "Alliance'up", déi an der Kris gegrënnt gouf, fir d'Interête vun den Independanten a Start-Upen ze vertrieden. D'Associatioun huet scho ronn 1.000 Memberen. Ee vun de gréisste Problemer fir d'Betriber wier iwwerdeems de Loyer - hei kéint hie sech zum Beispill steierlech Erliichterunge virstellen, fir Proprietären, déi d'Loyere reduzéieren oder aussetzen. Grad an der Stad wier d'Situatioun scho virun der Kris ugespaant gewiescht.

"Wéinst dem Tram, wéinst deene ville Constructiounen, an et sinn der ganz vill, déi investéiert hunn, well d'Ekonomie war jo gutt, firwat net investéieren? An dat koum elo just am Ufank vum Joer. Dat heescht, et ass keen, deen eng kleng Reserve gemaach huet. Dofir, de Staat muss ukommen, firwat? Well de Staat gefrot huet zouzemaachen. Dat heescht, si si verantwortlech fir déi Decisioun, dat war och eng ganz gutt Decisioun sanitär-méisseg, mä elo muss och de Staat ukommen, fir de Leit ze hëllefen."

Well d'Betriber net vill Reserven haten, si verschiddener nämlech och elo net eligibel fir verschidde staatlech Hëllefen ze kréien.