E Freideg huet sech de Premier mat de Vertrieder vun de konventionéierte Culte getraff, fir iwwert den Deconfinement an de reliéise Lieuen ze schwätzen.

Reunioun mat de Culten / Reportage Fanny Kinsch

D’Culte  musse sech nach e bësse gedëllegen: e Méindeg wëll d’Regierung nämlech annoncéieren, wéini nees dierfe Gottesdéngschter organiséiert ginn.

No Kritik, notamment vum Kardinol Jean-Claude Hollerich leschte Weekend, huet de Premier a Kultus-Minister e Freideg de Moien d'Vertrieder vun de konventionéierte Kulten empfaangen, fir iwwert den Deconfinement an de reliéise Lieuen ze beroden.

De Xavier Bettel hätt hei erkläert, datt een hätt wéilten ofwaarden, bis d'Sécherheetskonzepter vun alle Cult virléichen, sot eis de Weibëschof Léo Wagner no der Reunioun. Zu dëse Konzepter hätt een dann och Feedback kritt. De Staatsminister hätt d'Reouverture vun de Culten an där Phas gesinn, déi den 1. Juni ufänke géif, an et misst een deemno nach ofwaarden, wéi een Impakt déi zweet Phas vum Deconfinement hätt. Wat dat fir Péngschten heescht, weess een elo nach net, esou de Léo Wagner, et géif een awer elo ufänken, sech ze preparéieren an d'Distanzéierungsmesuren en place ze setzen.

"Mir kënne just elo schonn eis Poren natierlech opmierksam maachen, datt se scho verschidde Precautioune sollen huelen, déi jo mat Sécherheet musse geholl ginn, notamment d'Zeechen, d'Signalisatioun, d'Markéiere vun de Plazen an och aner Precautiounen, déi musse geholl ginn, d'Beschafe vun Desinfektiounsmëttel. Dat sollen se elo schonn alles an d'Weeër leeden, dass. wa mer dann e Méindeg gewuer ginn, wéini dat et lassgeet, mer da séierst méiglech och kënnen ufänken."

D'Gespréich wier konstruktiv verlaf, huet et vu béide Säite geheescht.