Da war d'Police nach an der Nuecht wéinst ze vill Kaméidi ganzer 30 Mol am Asaz.

An der Nuecht op e Samschdeg, dat géint 3 Auer, hate sech tëscht dem Zéissengerkräiz an der Ausfaart Helleng, a Richtung Belsch, zwee Gefierer ze pake kritt. Hei war en Auto enger Camionnette hannendrop gerannt. Blesséiert gouf hie keen, ma den Auto huet kuerz nom Accident Feier gefaangen an ass ganz ausgebrannt. D'Camionnette gouf just liicht beschiedegt, esou datt de Chauffer weiderfuere konnt.

Géint 17 Auer e Freideg hat zu Kanech den Daach vun enger Scheier gebrannt. Et blouf beim Materialschued an et ass kengem eppes geschitt. Zu Useldeng koum et um 19 Auer zu engem klenge Brand an engem Appartement an der Rue de l'église an zu Géisdref hat e Kamäin Feier gefaangen. Och hei blouf et beim Materialschued.

Zu Rëmerschen ass e Samschdeg de Moien eng Persoun vun engem Auto ugestouss ginn. De Foussgänger gouf blesséiert.

Dann huet d'Police nach Permisen agezunn, dat ënner anerem an der Rue Dwight David Eisenhower an der Stad, wou en Automobilist an eng Ofspärung gerannt ass. Da Mann gouf net blesséiert, ma hat awer ze vill gedronk. Zu Betzder war e Chauffer opgefall, deen zimmlech "rasant" ënnerwee war. D'Police konnt d'Gefier unhalen an et huet sech erausgestallt, datt de Mann ënner Drogen- an Alkoholafloss ënnerwee war.

Da war d'Police ganzer 30 Mol am Asaz, well hinne an der Nuecht ze haarde Kaméidi gemellt gouf. Dat esouwuel vu Musek, wéi och vu Persounen. D'Leit hu wuel op der Strooss, a Wunnengen oder am Gaart ze haart gefeiert. An all de Fäll hunn déi betraffe Leit d'Situatioun agesinn an hunn dono méi lues gemaach.

De CGDIS mellt en Accident zu Bieles an der Escher Strooss, dat um 11 Auer de Samschdeg de Moien. E Gefier ass op dëser Plaz an eng Rei geparkten Autoe gefuer. Et gouf 1 Blesséierten.

An der Stad ass ëm 12.30 e Samschdeg e Won an d'Leitplank geroden, och hei gouf eng Persoun blesséiert.

An zu Märel an der Rue Beatrix de Bourbon sinn zwee Autoen aneneegerannt. Hei gouf kee verwonnt.