En Donneschdeg gouf den Avis vun engem Affekotebüro iwwert d'Police-Fichieren der Kommissioun presentéiert.

Chamberkommissioun iwwer Policefichieren / Eric Ewald

D'Deputéiert aus de Chamberkommissioune vun der bannenzeger Sécherheet an der Justiz kruten am Nomëtten am Zesummenhank mat de Policefichieren en Avis vun engem Affekotebüro presentéiert. D'CSV- an adr-Oppositioun huet no der Sëtzung erkläert, dass ee bis elo net op alle Punkte Satisfaktioun kritt hätten.

Gilles Roth (CSV): Et ass nach ëmmer méiglech, dass Infraktiounen, obscho se verjäert sinn, nach kënnen, no där neier Versioun, an dem Fichier stoen, wat absolut net geet!

Bis den 20. Juni sollen d'Deputéiert aus de Chamberkommissioune vun der bannenzeger Sécherheet an der Justiz hir Observatiounen zu engem Avis iwwert d'Policefichiere virleeën, dee si en Donneschdeg de Mëtteg presentéiert kruten. Dat sot de François Bausch no där entspriechender Kommissiounssëtzung. De Minister vun der bannenzeger Sécherheet wëll de finalen Text zu de Fichiere vun der Police Enn Juli duerch de Ministerrot goe loossen an en dann och an der Chamber deposéieren. An der Kommissiounssëtzung am Cercel huet de François Bausch dëst gesot zu den 1,15 Millioune Protokoller, déi schonn aus de Policefichieren erausgeholl goufen.

Extrait François Bausch (1)

François Bausch (Policeminister): Parkprotokoller zum Beispill hu mer scho 682.716 Avertissements taxés erausgeholl, also entpersonaliséiert, soubal se selbstverständlech bezuelt ginn. Dat ass nëmmen, wa se bezuelt sinn, a mir hunn och bei de CSA, also bei dem Radarsystem, 472.688 Avertissements taxés schonn entpersonaliséiert, soubal se bezuelt gi sinn. Also, ech mengen, mir sinn do op engem gudde Wee!

Et wéilt een all d'Avertissements taxés kucken a se aus de Fichieren eraushuelen, wa se da bezuelt sinn, huet de Minister betount. Domadder ass d'Oppositioun och zefridden

Gilles Roth (CSV): Do huet de Minister Bausch eis gesot, dass en där iwwer eng Millioun an der Lescht geläscht loossen hätt, an dat kënne mer nëmmen appreciéieren!

Op wichtege Punkten awer hätt een net déi gewënschten Äntwerte kritt

Roy Reding (ADR): [...] wat geschitt mat non-lieuen, wat geschitt mat deene Saachen, déi prescrivéiert sinn asw.? D''Äntwerten nach ëmmer vage a mir hunn och nach kee konkreten Text kritt!

Commentairen zum Text hätt een ewell an der Sëtzung virbruecht, huet den adr-Vertrieder betount, dee selwer bis dato nach keng Satisfactioun kritt hätt. Dobäi wär een de Moment an enger illegaler Situatioun:

Roy Reding (ADR): Et gi Saache gemaach, déi net legal sinn, déi net an der Rei sinn, an et ass an der Regierung hirem Interêt, fir dat schnellstméiglech opzebotzen. A mir sinn Demandeur, mir si jo net déi, déi hei bremsen.

Mir hätte gär en Text, duerch deen déi Saachen, déi mer ugeschwat hunn, gereegelt ginn, huet de Roy Reding fonnt.

De François Bausch huet erkläert, datt nach Detailer ze diskutéiere wären an datt no der Vakanz eng juristesch Kommissioun heiwéinst zesumme kéim:

François Bausch (Policeminister): Et muss ee jo awer gesinn: Tëscht dem Fichier central vun der Police an der Justiz hirem Fichier, do gëtt et jo awer e kloert Zesummespill, an dofir musse mer elo hei Saache maachen, net dass mer herno Saache gemaach hunn, déi net fonctionnéieren an der Praxis!“

Wat méiglech penal Sanktiounen ugeet, wär ee sech eens:

François Bausch (Policeminister): Dat net-Respektéiere vun den Dateschutzreegelen, dat ass kee Kavaléiersdelikt! An dat muss een och als solches gesinn an och sou handhaben!

Dem Minister vun der bannenzeger Sécherheet no géif et net drëms goen, fir total doniefte penal Sanktiounen anzeschreiwen, mä et misst eng gewëss Responsabiliséierung komme vun deenen, déi sech net un d'Regelen halen; gemeinsam misst ee kucken, wéi wäit een do geet.

E Mëttwoch war iwwerdeems bekannt ginn, dass eng Instruction judiciaire géint den Direkter vun der Regionaldirektioun Norde vun der Police opgemaach gouf. De François Bausch wollt dozou kee grousse Kommentar ofginn, well hien de Secret de l'instruction respektéiere wéilt:

Extrait François Bausch (2)

François Bausch (Policeminister): Dat Eenzegt, wat de Minister hei à court terme ze maachen huet, dat ass, wann eng Demande kënnt vun der Inspection générale de la Police oder der Generaldirektioun vun der Police un de Minister, fir eng Suspensioun ze maachen, vun deem Beamten, bon, da muss ech mer dat ukucken! Déi Decisioun muss de Minister jo direkt huelen. Bis elo hunn ech nach keng virleien, ma wann déi kënnt, kucken ech mer dat natierlech un, an da wäert ech do eng Decisioun huelen. A fir de Rescht, mengen ech, soll hei d'Inspection générale de la Police an d'Autorité judiciaire hir Aarbecht maachen!

De Generaldirekter vun der Police hätt hien direkt iwwert d'Perquisitiounen an dësem Zesummenhank informéiert, sou de Minister, fir deen déi concernéiert Leit hir Aarbecht solle maachen. Da geséich ee weider.