Wéi den CGDIS mellt, koum et e Sonndeg den Owend géint 22.20 Auer zu engem Feier an engem Haus zu Äischen an der Grand-rue.

Eng Stroumkëscht wier a Brand geroden. D’Pompjeeë vun Habscht, Stengefort, Mamer, Tënten a Réiden waren am Asaz, wéi och de Samus-Noutdokter aus der Stad. Eng Persoun wier liicht blesséiert ginn.

Weider Virfäll

Géint 17.30 Auer e Sonndeg den Owend ass tëscht Fëlschdref an Elleng e Motocyclist gefall a gouf verwonnt.

Tëscht Nidderaanwen a Mënsbech sinn no 18 Auer nach e Moto an en Auto anenee gerannt. Hei gouf de Motard blesséiert a mat der Ambulanz aus der Stad an d’Spidol bruecht.

An der Iechternacherstrooss an der Stad stoung géint 4.30 Auer e Méindeg de Moie fréi en Auto a Flamen.

D'Police mellt dann och nach e Virfall an der Nuecht op e Méindeg géint 1 Auer. Hei ass eng Police-Patrull op een Automobilist opmierksam ginn, dee mat héijer Vitess duerch den Tunnel St. Esprit gefuer ass. D'Patrull huet de Fuerer gestoppt an huet missen erkennen, dass de Mann ze vill gedronk hat. De Permis war fort.