D'Majoritéit am Stater Gemengerot geet léiwer en anere Wee a wëll den Dialog mat de Proprietäre sichen an eventuell eng Spekulatiounssteier aféieren.

Hausse vun der Grondsteier gefuerdert / vum Eric Ewald

Terrainen an der Stad, déi am Bauperimeter leien an awer broochleie gelooss ginn, do sollt der Oppositioun no d'Grondsteier 30 Mol méi héich ginn. Dat huet d'Stater Oppositiounsparteien déi Gréng, LSAP an déi Lénk am Kampf géint déi horrend héich Logementspräisser gefuerdert. Si hunn e Méindeg am Nomëtten am Gemengerot eng entspriechend Motioun abruecht: Deemno sollt dës Steier, déi de Moment bei 500% läit, fir den 1. Januar op 15.000% eropgoen, also verdrëssegfacht ginn. Fir déi 3 Parteie wären, Zuele vum Liser no, 117 Hektar Terrain an der Stad direkt ze bebauen.

DP, CSV an ADR hu géint dës Motioun gestëmmt. De Stater Schäfferot proposéiert den Dialoge mat de Proprietäre vun de betraffenen Terrainen ze sichen. Et wëll een de Leit roden, wa si da verkafe wëllen, dann un d'ëffentlech Hand. Et soll och gekuckt ginn, ob een um Niveau vum Pakt-Logement eng spezifesch Tax, eng Spekulatiounssteier, aféieren kann, déi gewëss Promoteuren trëfft. Virop wieren awer och an dëser Debatte d'Regierung a méi spezifesch d'Inneministesch gefuerdert.

Virum Vott: Oppositiounsparteie stellen hir gemeinsam Motioun vir

Um Méindeg de Moien hunn d'Oppositiounsparteien ewell op enger gemeinsamer Pressekonferenz Detailer zu hirer Motioun presentéiert. Déi gréng, d'LSAP an déi Lénk aus der Stad wëlle mat hirem Virstouss e Signal setzen.

De gréngen Deputéierten a Stater Conseiller François Benoy huet d'Propositioun mat engem Beispill illustréiert: "Aktuell, op enger Parzell, déi am B6 läit, vun 2 Ar, bezilt een eng 400 €. Wann een dat mat 30 multiplizéiert, also deen Taux, dee mir proposéieren, da lant ee bei 13.000 € d'Joer."

Déi proposéiert substanziell Hausse vun der Grondsteier hätt d'Zil, fir Baulücken ze mobiliséieren, an net fir ze bestrofen, seet de François Benoy. "Et geet net drëms, fir d'Grondsteier generell z'erhéijen," esou de grénge Conseiller, "eis Propositioun beschränkt sech op de B6, dat heescht Baulücken, déi direkt disponibel sinn."

Et wéilt ee Proprietäre mat där proposéierter Mesure dozou incitéieren, fir en Terrain oder Terrainen ze verkafen, respektiv ze bebauen. Dikrech hätt eng Hausse vun der Grondsteier virgemaach, iwwerdeems hätten 30 Gemenge méi en héije Grondsteier-Taux wéi d'Stad.

D'DP/CSV-Majoritéit géif nees eng Spekulatiounssteier an d'Diskussioun bréngen.
Och de fréieren DP-Buergermeeschter Paul Helminger hätt dat probéiert, wier awer sengerzäit domat gescheitert.

De Conseiller vun déi Lénk Guy Foetz stéiert sech drun, dass an der Stad en Terrain nëmme bebaubar ass, wann eng Baugeneemegung virläit. "Am Pacte logement, do steet, dass all Terrainen, déi iergendwou am PAG vun der Stad oder vun der Gemeng optauchen als bebaubar fir Wunnengen, bebaubar Terraine kënne sinn," esou de Guy Foetz.

Dem Vertrieder vun déi Lénk no sollt en Terrain bebaubar sinn, wann e PAP virläit. De Moment wär d'Stäreplaz zum Beispill net ze bebauen, obwuel zanter 10 Joer e PAP dozou virléich. Fir de Guy Foetz leit déi grouss Mass vun de Leit heirënner an et kënnt zu enger Verdrängung vun den ënneschten a mëttlere Schichten aus der Stad.

Och fir den LSAP-Conseiller Tom Krieps steet d'Wuel vun der Allgemengheet op dësem Punkt net am Virdergrond. Duerch d'Wunnengsnout wär et awer kloer, dass eppes misst gemaach ginn an "dass mer dat net kënnen op déi griichesch Kalende verschiben, wéi dat jorelaang geschitt ass." A sengen Ae wier nämlech, wa bebaubar Terraine weider eidel stoe gelooss géife ginn, d'Stater Populatioun op laang Siicht net méi déi selwecht.