Op enger Kaart ginn d'Inzidenze vun de leschte 7 Deeg pro 100.000 Awunner vu Lëtzebuerg an aneren EU-Memberstaaten ugewisen.

Och Schengen-assoziéiert-Staaten, Groussbritannien an Nordirland ginn hei opgelëscht. Vun alle Länner ass Lëtzebuerg dat Land, dat am schlechtsten ofschneit mat iwwer 50 Fäll pro 100.000 Residentë bannent de leschte 7 Deeg.

Ze präziséieren wier, dass de Robert-Koch-Institut dës Richtlinn vu 50 Fäll pro 100.000 Residentë virschreift. Hei ass awer ze bemierken, dass bei den Zuele vu Lëtzebuerg, souwuel d'Residenten, wéi och d'Frontalieren, déi infizéiert sinn, mat aberechent ginn. Dës Approche géif d'Zuelen fir de Grand-Duché zwar "verfälschen", ma mécht just ronn 10% vun den Neiinfektiounen aus, esou d'Gesondheetsministesch Paulette Lenert e Freideg op der Pressekonferenz. Et gëtt awer kloer vun der Lëtzebuerger Regierung den Appell gemaach, dass EU-wäit eng méi ofgestëmmten Approche misst bei den Zuele gefuer ginn. Änlech hat och den Ausseminister Jean Asselborn sech e Freideg geäussert.

Am beschte kommen Däitschland, Holland, Irland, Finnland, Dänemark, Italien, Ungarn, Slowakei, Litauen, Lettland, Estland a Griicheland ewech mat 0 bis 5 Fäll pro 100.000 Awunner an deem selwechten Zäitraum. Eis franséisch a belsch Nopere leie bei engem Schnëtt tëscht 5 an 10 Nei-Infektiounen op déi selwecht Awunnerzuel gekuckt.

Wéini gëllt e Land als Risikogebitt?

Eng Regioun gëtt no enger gemeinsamer Analys an Entscheedung vum däitsche Gesondheetsministère, dem auswäertegen Amt, dem Inneministère an dem Ministère fir Heemecht a Bau als Risikogebitt agestuuft.

Dës Aklasséierung baséiert op 2 ënnerschiddleche Bewäertungen. Engersäits gëtt gekuckt, ob et an engem Land an de leschte 7 Deeg méi wéi 50 Nei-Infektiounen op 100.000 Awunner goufen, wat op Lëtzebuerg zoutrëfft. Anerersäits gëtt no qualitative Krittäre festgestallt, ob a Staaten, déi ënnert dem nominale Grenzwäert leien, awer eng héich Infektiounsgefor besteet.

An der offizieller Lëscht vum Robert-Koch-Institut gëtt de Grand-Duché aktuell net als Risikoregioun aklasséiert. Dës Lëscht gouf allerdéngs den 3. Juli 2020 fir d'lescht aktualiséiert.