En Dënschdeg de Moie war de Waringo-Rapport Sujet an der Institutiounekommissioun.

Wéi geet et viru beim Ëmsetze vum Rapport vum Jeannot Waringo iwwert de Fonctionnement um groussherzoglechen Haff? Déi Fro huet en Dënschdeg de Moien an der parlamentarescher Institutiounekommissioun dominéiert, nodeems de Rapport Enn Januar publizéiert gouf.

Waringo-Rapport / Rep. Joel Detaille

Bal en halleft Joer war een op Demande vun der CSV beieneen, fir dass d'Chamber gewuer gëtt, wéi et mam Ëmsetze vum ominéise Waringo-Rapport ausgesäit.

"Ech sinn éierlech: Duerch Corona war de Palais elo net meng éischt Prioritéit an de lechte Méint". Dat sot de Premier Xavier Bettel no der Reunioun vun der parlamentarescher Institutiounekommissioun. De Xavier Bettel war formell, wéi hie vun de Journaliste gefrot ginn ass, wat da säin Haaptmessage un d'Deputéiert war. Xavier Bettel: "Dass d'Aarbechten amgaange sinn. Dass awer ech éierlech sinn, dass duerch Corona et aner Prioritéite gouf wéi den Haff. Parallel hate mer awer eng Dose Reunioune mam Palais a mat den Administratiounen, fir ze kucken, wéi mer déi Transparenz, déi jo am Rapport vum Här Waringo recommandéiert gouf," ëmsetzen.

Et ass also kee Rapport, deen am Tirang gelant ass, mä en hätt schonn eng positiv Wierkung op de Fonctionnement um Haff gehat. Dat fënnt och de President vun der Institutiounekommissioun, den LSAP-Deputéierte Mars Di Bartolomeo:

"Wat ech festhalen, ass, dass de Wee a Richtung méi finanziell Transparenz ganz kloer begaange gëtt an am Budget 2021 säi Nidderschlag wäert fannen. Do gëtt ganz seriö dru geschafft. Wat de Rekrutement an d'Personalpolitik ugeet, do ass et 'work in progress'."

An dass och de Statut vum Personal méi kloer wäert definéiert ginn, wéi och, wat dann elo déi ëffentlech Missioun vum Staatschef ass, a wat éischter dat Privat duerstellt. An deem Sënn wär och d'Aarbecht vun der Kommissioun an de leschte Méint a puncto Verfassungsreform gutt virukomm. De Volet Justiz ass deponéiert an den Deel iwwert d'Staatsform an iwwert d'Cour Grand-Ducale soll d'nächst Woch eng éischte Kéier virgestallt ginn.

Den CSV-Deputéierte Léon Gloden hëlt sengersäits de Premier beim Wuert, dass de Rapport "Chef-Saach" wier – an do wier hien nach hongreg op méi Informatiounen:

"T'ass kloer, dass zanter Mäerz Corona absolut Prioritéit hat. Mä de Premier huet selwer ëmmer nees gesot, dass d'Aarbechte viru ginn. Et wier Chef-Saach. A wann een esou ee Statement ëffentlech mécht, an et informéiert een d'Chamber net, well wa mir als CSV keng Demande gemaach hätten, wiere mer nach méi hongreg an d'Vakanz gaangen. Ech mengen, hien huet de Message awer verstanen, well hie sot, dass hien am September wäert zeréck komme mat de Reegele vum Budget an dem Text vum Arrêté iwwert d'maison grand-ducale."

En Deel vun der Kommissiounssitzung war iwwregens à huit clos. Ob et do ëm de rezenten Tëschefall goung, bei deem de Staatsminister um Haff hat missen intervenéieren, fir d'Entloossung vum Chef de cabinet Michel Heintz réckgängeg ze maachen, bleift deemno Spekulatioun.