De Projet ass ewell um Instanzewee, ma Kritik kënnt vum Mouvement écologique.

Lëtzebuerg soll en neie Qualitéis- an Zertifizéierungssystem kréien. Rezent krut den entspriechende Projet de loi am Regierungsrot de Feu-Vert, et solle just nach technesch Korrekture gemaach ginn.

Liewensmëttelproduktioun - Reportage Pit Everling

Am Text gëtt definéiert, ënner wéi enge Konditiounen d'Liewensmëttelproduzenten e staatlech unerkannte Label kënne kréien. Et gi minimal Exigenze festgeluecht, fir e staatlechen Agrément ze kréien an den entspriechende Logo kënnen ze benotzen, iwwregens de Logo vum Nation Branding.

Et kommen dräi grouss Kategorië vu Krittären, sou de Landwirtschaftsminister Romain Schneider. D'Qualitéit an de Geschmaach, zweetens d'Regionalitéit an dono d'Ëmwelt an d'Déierewuel, sou nach de Romain Schneider.

Fir all Kategorie gi ronn 10 Krittären am Projet opgelëscht. Pro Kategorie muss 1 Krittär erfëllt sinn, fir de Label ze kréien.

Vill Kritik kënnt op där Plaz vum Mouvement écologique. Et géing net duer, just ee Krittär pro Kategorie mussen z'erfëllen. Dat wier de Konsument op d'A gedréckt. De Mouveco bedauert dernieft, datt de Landwirtschaftsminister den Text lo duerch de Regierungsrot bruecht hätt ouni eng éierlech Diskussioun dobausse gesicht ze hunn.

Eng eemoleg Chance géing verpasst ginn, sou d'Presidentin Blanche Weber. Si verlaangt Nobesserungen:

"An all Beräich 1, dat geet duer a schonn huet een e Label, dat ass de Konsument op d'A gedréckt. Wann dat do géing gräifen, hätt de Label och keng Chance. Dem Konsument geet et net duer, datt just Offall uerdentlech geréiert gëtt, oder dass ee bei der Qualitéit einfach un engem auslännesche Concours deelgeholl huet."

De Minister kontert, datt den Text aus zäitleche Grënn lo séier huet missten op de Instanzewee. Hie verweist op Contraintë vu Bréissel, ënner anerem géinge verschidde Marques nationales geschwënn net méi unerkannt ginn:

"Mir sinn effektiv ganz no viru Strofen, déi mer hätte kënne kréie vu Bréissel. Dat wollt ech evitéieren. Ech war selwer zu Bréissel mat mengen Zerwisser. Fir Rou an den Dossier ze kréien, gëtt een de Projet lo sou séier et geet op den Instanzewee an e Suivi soll hannendrun ugeduecht ginn."

Extrait Romain Schneider

Hie wéilt nach mat der Chamber schwätzen, d'Press informéieren an dono mat allen Acteure kucken, wou um Text nach ka gefeilt ginn, sou de Landwirtschaftsminister Romain Schneider.

Bëssen anescht wéi de Mouveco gesäit et d'Baueren-Allianz.

Et gouf en Dialog an 20 Joer al Fuerderungen aus dem Secteur ginn hei ëmgesat, begréisst de Vizepresident Marco Koeune:

"Mir hunn de Moment 20 Labelen, déi iergendeppes aussoen, awer net iwwer d'Aart a Weis wéi produzéiert gouf. Fir mech ass et e Quantesprong, wann d'Lat elo op e gewëssen Niveau geluecht gëtt a mer ginn doduerch eise Produiten eng Chance."

Wat d'Fuerderunge vun der Bauerenallianz ugeet, sou misst d'Regionalitéit méi kloer visibel sinn an den Heemvirdeel vun de Produzente vu Lëtzebuerg sollt méi kloer definéiert ginn, sou nach de Marco Koeune.