En Dënschdeg de Moie souze sech den Aarbechtsminister Dan Kersch an de Marc Spautz (CSV) géigeniwwer.

Lëtzebuerg ass keng Insel, a mir si frou, dass d'Press hëlleft, esou Fäll opzedecken. Op deem Punkt ware sech den Aarbechtsminister Dan Kersch an den CSV-Deputéierte Marc Spautz en Dënschdeg de Moien eens an eisem Face-à-Face iwwert d'Sujete Mënschenhandel an Zwangsaarbecht am Grand-Duché.

Face-à-Face: Mënschenhandel an Ausbeutung op der Aarbecht

Béid Politiker fäerten och, dass et nach méi Fäll ginn, déi bis ewell net un d'Liicht komm sinn. Et wier awer schwéier dës all opzedecken. Dacks och, well déi Concernéiert géife fäerten, sech bei den Autoritéiten ze mellen. D'Matière vu Mënschenhandel wier souwisou eng ganz komplex, huet den Dan Kersch erkläert, wou ganz vill Acteuren aus ville Beräicher missten zesummeschaffen. Et géif een och feststellen, dass Leit ëmmer nees nei Faille fannen, wou een dann nees misst legislativ nobesseren. Och Schwaarzaarbecht wier an deem Sënn alles anescht wéi e Kavaléiersdelikt.

"Mir mussen hei mat Allem, wat mer zur Verfügung hunn, dogéint virgoen.  D'Salariéeë protegéieren, awer och d'Betriber viru sou enger Concurrence deloyale", sou den Dan Kersch.

De Marc Spautz kéint sech en anere Strofe-Katalog virstellen, wéi dat, wat haut en vigeur ass. Manner Geldstrofen a méi sec Mesuren, wéi e Betrib eng gewëssen Zäit ganz zoumaachen, wier vläicht méi effektiv, sou de fréieren Aarbechtsminister. Finanziell awer och laang Fermeturë vu Schantercher. Dacks géifen d'Sanktiounen déi Onéierlech nämlech manner kaschten, wéi dat, wat se duerch d'Zwangsaarbecht erakréien.

Méi drastesch Strofe wieren och effektiv am entspriechende Gesetzprojet virgesinn, sou den Dan Kersch. Béid Politiker ware sech eens, datt d'Gewerbeinspektioun nach méi a gutt forméiert Personal brauch. De Minister Kersch ënnersträicht och, datt een d'Aarbechtsrecht an d'Gesetzer reegelméisseg misst upassen, och op EU-Niveau, an d'Zesummenaarbecht tëscht de verschiddenen Acteuren nach kéint verbessert ginn.