An engem Schreiwes un d'Awunner vu Kielen huet de Félix Eischen matgedeelt, datt hien e Burn-Out diagnostizéiert krut.

Hie wéilt sech duerfir och déi néideg Zäit ginn, fir sech adequat traitéieren ze loossen. Dës Nouvelle gouf am Kielener Gemengerot public gemaach, wou den Här Eischen selwer net present war. Wéi et an engem perséinleche Schreiwes vum Félix Eischen un d’Kielener Awunner heescht, hätt den zousätzleche Stress an eng konstant Iwwerschaffung zum Burn-Out gefouert.

Den Interim als Kielener Buergermeeschter mécht bis op Weideres den LSAP-Politiker Guy Scholtes, dee bis ewell Éischte Schäffe war.

Den CSV-Conseiller Lucien Koch, dee sengersäits bis Dezember Schäffe war, ass bis op Weideres Schäffe faisant fonction zu Kielen.

De Félix Eischen war nieft sengem kommunale Mandat och nach zanter 2009 Deputéierte fir d'CSV a Generalsekretär vun der Partei. Zanter 2017 war de fréieren RTL-Mataarbechter Buergermeeschter zu Kielen.

An der Chamber siegéiert de Félix Eischen elo weider als gewielten CSV-Süd-Deputéierten. De Poste vum CSV-Generalsekretär iwwerhëlt ee vun de béiden Adjointe Kimi Mosel a Paul Galles.

Hei d'Schreiwes vun der CSV:

Den CSV-Generalsekretär Félix Eischen huet viru kuerzem dem Parteipresident Frank Engel matgedeelt, datt hien aus gesondheetleche Grënn säi Mandat bis op Weideres muss roue loossen. Dat ass fir eis Partei e schwéiere Moment, mee fir de Félix Eischen nach vill méi.

D'Joer 2020 mat senger sanitärer an ekonomescher Kris huet fir vill Leit grouss Erausfuerderungen an och eng grouss psychesch a moralesch Belaaschtung mat sech bruecht. De Félix, dee seng Mandater mat groussem Engagement wouer hëlt, huet dës Belaaschtung och perséinlech am Laf vun de leschte Méint allze däitlech gespuert.

Hien huet dowéinst decidéiert, sech an nächster Zäit em seng Gesondheet ze këmmeren a sech engem adequaten Traitement ze ënnerzéien. Elo ass de Moment komm, wou de Félix muss no sech selwer kucken, Rou a nei Energie fannen, mat der Ënnerstëtzung vu senger Famill an deenen, déi him no stinn. Mir wäerten hien, wéi och ëmmer mer dat kënnen, no Kräften dobäi ënnerstëtzen, datt hien zu senger aler Form zréckfënnt.

Iwwert déi organisatoresch intern Upassunge wäert d'CSV a nächster Zäit kommunikéieren.

Mir wënschen dem Félix eng gutt Erhuelung a freeën eis, hien esou bal wéi méiglech nees am Team ze hunn.

matgedeelt vum CSV-Generalsekretariat