Et war sech ewell um Mëttwoch erwaart ginn, e Freideg den Owend ass et dann de Fall: och den RKI setzt Lëtzebuerg nees op d'rout Lëscht.

De Grand-Duché ass also nees Risikogebitt fir Däitschland, wéi et an engem Communiqué vum Ausseministère heescht. Dobäi referéiert sech de Robert Koch-Institut op den Inzidenz-Wäert vun 50 Infektiounen op 100.000 Awunner.

An der Woch vum 14. bis den 20. September ass d'Zuel vun den neie confirméierte Fäll op 672 Residentë geklommen. Déi Woch virdru waren et der 282. No engem Mount läit Lëtzebuerg iwwerdeems mat 107,33 Fäll bei iwwer 50 Infizéierter op 100.000 Awunner (Stand vun e Mëttwoch). Déi lescht Woch waren et der nach 45,04.

Mëtt Juli gouf Lëtzebuerg déi leschte Kéier als Risikogebitt aklasséiert. Ouni negative Corona-Test, deen net méi wéi 48 Stonnen al war, duerft een net iwwert d'Grenz fueren. Vun däitscher a Lëtzebuerger Säit gouf sech iwwert e Mount dofir agesat, Lëtzebuerg vun där Lëscht ze sträichen. Den 20. August gouf de Grand-Duché du vun der Lëscht erofgeholl.

Op der RKI-Lëscht vun de Risikogebidder stinn och zum Beispill vill franséisch Departementer, d'Regioun Bréissel an eenzel Provënzen an Holland. Fir Leit, déi aus dëse Regiounen zeréck an Däitschland kommen, gëlle jee no Bundesland verschidde Reegelen vu Quarantän-, respektiv Test-Flicht.

© RTL-Grafik

Wat dës Decisioun da genee matsechbréngt, notamment fir Frontalieren oder Studenten, hu mir am Moiesjournal op RTL Radio Lëtzebuerg den Ausseminister Jean Asselborn gefrot.

Lëtzebuerg Risikogebitt - Interview mam Jean Asselborn

"Wien net onbedéngt muss an Däitschland goen, soll dat léiwer si loossen", dat sot den Ausseminister Jean Asselborn um Samschdeg de Moien am RTL-Interview.

Vun e Méindeg u gouf et vill Gespréicher mam däitschen Ausseminister Maas.

Ma Berlin schéngt awer nëmmen d'Zuel 50 ze zielen, esou de Jean Asselborn.

Wéi bei der leschter Kéier, wéi mir scho Risikogebitt waren, gëllt eng Test-Flicht. Hei muss den Test dann net méi al sinn ewéi 48 Stonnen.

Wéinst dem federale System an Däitschland kënnen awer fir all Bundesland aner Quarantän-Reegele gëllen.

Mat deene Bundesländer, déi u Lëtzebuerg grenzen - Saarland a Rheinland Pfalz also - géing awer versicht ginn, speziell Eenegungen ze fannen.

Den Ausseminister verséchert, dass hien den Ament och mat Berlin weider am Gespréich wier. Den Inzidenz-Wäert eleng sollt nämlech net aussoen, ob e Land Risikogebitt gëtt oder net.

Vill méi sollt déi sougenannten Corona-Ampel gekuckt ginn. Dësen Outil consideréiert net nëmmen d'Nei-Infektiounen, mä och d'Doudesfäll an d'Kapazitéiten an de Spideeler, respektiv wéi vill Leit op der Intensivstatioun sinn. Bei dëse Critèrë géing Lëtzebuerg ganz gutt do stoen, esou de Jean Asselborn.

Hie weist sech awer bedréckt, dass Däitschland - trotz Presidence am EU-Conseil - sech weiderhin op den Inzidenz-Wäert baséiert.

Mat der Belsch hätt een eng vertrietbar Léisung fonnt. Mat Däitschland wieren d'Verhandlungen awer méi zéi. Et géing ee weiderhin hoffen, dass déi däitsch Regierung nei Dispositiounen trëfft an dës dann op enger aner Schinn ginn, esou de lëtzebuergeschen Ausseminister Jean Asselborn.

Offiziellt Schreiwes

Einstufung als Risikogebiet durch Deutschland
Communiqué par: ministère des Affaires étrangères et européennes

Die Bundesrepublik Deutschland hat heute beschlossen, auf Grund der erhöhten Infektionszahlen der letzten Tage Luxemburg erneut als Risikogebiet einzustufen. Dies könnte schon ab heute Abend gelten. Außenminister Asselborn steht diesbezüglich in engem Kontakt mit Bundesaußenminister Heiko Maas. Minister Asselborn weist darauf hin, dass die Infektionszahlen in Luxemburg seit Tagen wieder rückläufig sind und die Reproduktionsrate mittlerweile auf 0,95 gesunken ist. Luxemburg wird sich jetzt darauf konzentrieren, gemeinsam mit den angrenzenden Bundesländern, die Auswirkungen dieser erneuten Einstufung auf die Bevölkerung einzugrenzen.

Eine erneute Einstufung als Risikogebiet hat als Folge, dass Personen die aus Luxemburg nach Deutschland reisen möchten, einer allgemeinen Testpflicht unterliegen. Es gibt jedoch eine Reihe von Ausnahmen von dieser Testpflicht welche in den Quarantäneverordnungen der jeweiligen Bundesländer festgelegt sind.

Pressemitteilung des Ministeriums für auswärtige und europäische Angelegenheiten.