Den OGBL huet an engem Schreiwes en Donneschdeg kritiséiert, dass d'Baufirma CDCL d'Engagementer vis-à-vis vun de Salariéen net respektéiert hätt.

Wéi d'Gewerkschaft schreift, hätt d'Entreprise hir Aarbechter am Juli gefrot, fir de Congé collectif ëm eng Woch ze verlängere wéinst engem Organisatiounsproblem op de Chantieren. Dës 4 Deeg sollten dann am Laf vun den nächste Méint vun den Aarbechter nees opgeschafft ginn.

Den 10. September hätten déi concernéiert Aarbechter hir Salaire-Fichë kritt a festgestallt, dass hinnen 20 Prozent vun hirer Paien am August gefeelt hunn, also déi supplementär Congésdeeg, déi d'Direktioun gefrot hat.

D'Baufirma CDCL weist dës Kritik vu sech, d'Aarbechter géife kompenséiert ginn, sou wéi dat an der Personaldelegatioun accordéiert gi wier.

De Max Didier vun der Bau-Entreprise CDCL erkläert awer, dass dës Prozedur schonn ëmmer géing applizéiert ginn, zum Beispill wann Aarbechter d'Bréck wëlle maachen. Och da gëtt de fräien Dag accordéiert an d'Aarbechtszäit op engem Samschdeg nogeholl an duerno eréischt ausbezuelt. D’Direktioun bedauert, dass den OGBL sech un d’Ëffentlechkeet gewannt hätt. Et hätt ee sécher am Virfeld vum Accord eng Eenegung kënne fannen, wann dat kommunizéiert gi wier. Esou hätt d’Entreprise eng gängeg Prozedur applizéiert, iwwert déi sech nach ni ee beschwéiert hätt, esou de Max Didier.

Extrait Max Didier

D'Salariéeë kréien dann am September an am Oktober déi zousätzlech Aarbechtsdeeg, déi am August ebe gefeelt hunn, ausbezuelt. Dass an der Pai vum August awer 20% gefeelt hunn, hätt vill Leit och an finanziell Schwieregkeete bruecht, schreift den OGBL. Honnerte Salariéeë wäre concernéiert, betount den Hernani Gomes vum OGBL. Den Aarbechter no wier den Accord net esou ausgehandelt ginn, wéi elo vun der Direktioun ausgeluecht gëtt.

Extrait Hernani Gomes

D'Baufirma CDCL präziséiert par konter, dass déi nämmlecht Prozedur applizéiert gouf wéi an der Vergaangenheet och schonn. Mam Ënnerscheed, dass d'Aarbechtszäit net wéi soss am nämmlechte Mount konnt opgeschafft ginn, esou dass dann en Deel un der Pai feelt, dee spéider soll bezuelt ginn.